Gerîlaya YJA Starî Tîjda Ekecîke (Fatma Yagmure) serra 1996î de dewa Çekîçlerî ya Aksarayî de yena dinya û hîkayeya Ekecîke bi koçkerdiş dest pêkena. Keyeyê Ekecîke bi hawayo rêz surgunê Amed, Xarpêt, Agirî û sewbîna bajaranê Anatolîyaya Mîyanêne beno û Ekecîke keyeyêko winasî de çimanê xo akena. Koçkerdişê kurdê ke bi seserran verê amebî koç kerdene, tîya de zî nêqedîyeno. Keyeyê Ekecîke hîna 7 serreyîya Ekecîke de mecbûr maneno koçê Ewropa bikero.

Gerîla Tîjda Ekecîke bi emrê xo yo şenik de Tevgerê Azadîye şinasnena û dezgehanê Kurdîstanî de xebetîyena. Labelê seba ke na xebate aye mird nêkena, 2013 de Hollanda ra vera xo dana Koyanê Kurdîstanî.

2013 ra heta 2016î mîyanê Tevgerê Azadîye de ca gêna û netîceyê hêrişê artêşa tirkî de Zagrosan de bi embazanê xo şehîd bena.

KEYEYÊ MI KIRMANCKÎ QISEY KENÎ

Gerîla Tîjda Ekecîke şehadetê xo ra ver qala hîkayeya xo kena û wina vana: “Ez Aksaray de ameya dinya. Heta 7 serreyîya xo ewja de menda û dima ra ma koçê Ewropa kerd. Ez Ewropa de pîl bîya. Ma 3 waye û birayî bî. Mi 11 serrî mekteb wend. Mi rêxistine bi mabênkarîya pîyê xo şinasna. Keyeyê mi lehçeya dimilkî (kirmanckî/zazakî) qisey kenî. Mi sîstem de goreyê xo çîyêk nêdîyêne û cuya sîstemî mi rê bêmana ameyêne.”

QETLÎYAMÊ PARÎSÎ RA DIMA BEŞDAR BENA

Gerîla Tîjda Ekecîke Qetlîyamê Parîsî ra dima beşdarê PKKyî bîya û derheqê beşdarbîyayîşê xo de wina vato: “Mi xeyalê xo yê tewr girdî pê ard. Cuya koyî bi her hawayî mi de çîyê neweyî viraştî. Wexto ke ez ameya koyan, mi Akademîya Leyla Şaylemeze dî û netîceyê perwerdeyan de manadayîşêko cîya mi de virazîya. Xeyalê mi o bi ke kesê ke koçê Anatolîyaya Mîyanên û Ewropa kerdî, wa biagêrî cewherê xo ser. Ez xo ra zana ke beşdarbîyayîşê PKKyî xeyalê her ciwanê kurdî yo. Ancax ma eşkenî xeyalanê şehîdanê xo ganî bitepişî. Wa ciwanî xeyalanê xo taloq nêkerî. Ez wazena armancê şehîdan û azadîya Rayberîye pê bîyara. Serkewtiş do yê ma bo.”