Meclîsê Cinîyan ê Kongreya Demokratîke ya Şaran (HDK) ra Fatma Kiliçaslan da zanayene ke cinîyê ke prosesê pandemîya vîrusê Korona de keye de manenê rewşêka zaf bitehluke de yê.

Kiliçaslane vist vîrî ke cinîyê ke xîret kenê xo tehlukeyê vîrusî ra bipawê keye de maruzê şîdetî yenê û vat hişmendîya mîlîtarîste ya camêrdan vîrusî ra zêdêr bitehluke ya. Kiliçaslane da zanayene ke hûmara serebûtanê şîdetî ya adare emser se ra 38 zêdîyaye. Kiliçarslane ard ziwan ke vera şîdetî cinîyî nênê pawitene, neçare vera dîyenê ke camêrdan reyde heman keyeyî de bimanê. Kiliçarslane vat: ''Wezîfeyê dewlete yo ke vera nê şîdetî tedbîra bigêra. Labelê semedo ke tedbîr nêno girewtene doman û cinîyî mabênê vîrusê Korona û şîdetî de kenê ke xo bipawê. Dewlete hem cinîyan nêpawena hem zî çim visnena destkewteyanê cinîyan. Nê hêrişî do nêeşkê ke cinîyê israrê xo yê sema temsîlîya têdûşte ra fek vera bidê.''

Fatma Kiliçarslan bale ante polîtîkayanê dewleta tirke yê vera îşxalê Rojawanî ser û vat AKP wazeno pê pêkewtişê Lîbya şer giranêr bikero.

Fatma Kiliçarslan vist vîrî ke hewteyê vîyarteyî de hêrişê vera Mexmûrî de 3 cinîyî ameyî kiştene û vat: ''Na rewşe mojnena ma ke hîşmendîya camêrdan a mîlîstarîste vîrusî ra zêdêr bitehluke ya. Wextêk de ke merdimî seba weş bimanê keye de manenê û paştî danê yewbînan cenazaya lajekî dadîya ci rê pê posta erşawîyaye. Dewlete mîyanê şert û mercanê winasênan de zî huqûqê dişmenîye ra fek vera nêdana. La cinîyî tim vera ney paştî bidê haştîye. Heta ke cinîyî xo rêxistin nêkerê û pê hêzê xo nêhesîyê hêzêk seba cinîyan tedbîr nêgêno. Ganî cinîyî têkoşîn û paştdayîş pîya pîl bikerê û wayîrê têkoşînî bivejîyê.''