Goreyê melumatê Wezîrîya Karê Teberî yê Almanya nika 5 hemwelatîyê Almanya Tirkîya de zîndanan de yî. Labelê yeno zanayene ke na hûmare hîna zêde ya. Çimkî zaf reyan dezgeyê fermî yê tirkî no derheq de tay erey melumatanê hemwelatîyanê almanan danî Wezîrîya Karê Teberî.

Reyna yeno vatene ke derheqê 35 hemwelatîyê almanan de zî qedexeyê tebervejîyayîşê welatî esto. Rejîmê Erdoganî 2 serrî yo ke vera Almanya de sîyasetê esîrgirewtişî bikar ano û nîno zanayene ke do nika ra pey se bibo.

Çimkî zîyaretê Erdoganî yê Almanya ra ver Maasî qisey kerd û bale ant hemwelatîyanê Almanya yê tewqîfkerdeyan ser û wina va: “Hîna zî zîndan de bîyayîşê hemwelatîyanê ma nîno qebul kerdene.”

Kesê ke hetê rejîmê Erdoganî ra ameyî tewqîf kerdene ra yewe zî hunermenda kurdan Hozane Canê ya. Hozane Canêye mektûbêk erşawite Serekwezîra Almanya Angela Merkele rê û qala şertê xirabinan yê zîndanî kerda. Ajansê almanan ra DPAye zî bale anto rewşa Hozane Canê ser.

Hunermenda kurdî ke bajarê Kolnî de cuyena, seba ke weçînayîşê 24ê Hezîrane de destek bido HDPyî, şîybî Tirkîya. Hozan Canê mîtînga Edîrne ra dima ameybî tepiştene û seba ke fîlmo ke têkoşînê YPG û YPJyî yê vera DAIŞî de vatêne de kay kerda û ewja de şerwanan reyde fotografêk anta, yena sucdar kerdene.