Hemsereka Konseya Rayberdişî ya KCKyî Besê Hozat tewr yew programê taybetî yê Medya Haber TVyî bîye û babetê muhîmî yê rojdemî ercnayî.

Qiseykerdişê Hozate ra tay cayî wina yê:

''Şorişê Rojawanî ke bi paradîgmaya Rayber Apoyî ame kerdene ez pîroz kena û şexsê şehîdanê şorişî de heme şehîdanê Kurdîstanî bi hurmet yad kena. Bi nê şorişî vera sîstemê îqtîdar û dewlete sîstemêko altarnaf o komelkî vejîya meydan. Şorişê Rojawanî bi serkeşîya cinîyan bi. Her warê nê şorişî de keda cinîyan esta. Cinîyan vera DAÎŞî û dewleta tirke şer kerd. Vera nê şorişî xeylêk hêzî estê ke sereyê înan de dewleta tirke ya faşîste esta. Serra 2012î ra nata dewleta tirke hêrişanê xurtan kena ke çeteyan zî şuxulnena. Waşte ke heme Başûrê Kurdîstanî bi destê DAÎŞî îşxal bikero û heme qezancanê Rojawanî û yê heme kurdan meydan ra wedaro. Sey Şingal û Mexmûrî Hewler û Kerkuk de pê paştdayîşê PKKyî hêrişî ameyî şiknayene. Hela ke maneyê DAÎŞî ame şiktene maneyê AKPyî zî şikîya. Şorişê Rojawanî şorişêko neteweyî yo ke çar leteyê Kurdîstanî pabestî.

Ganî şehîdê Pirsûsî çarçeweya şehîdanê Kobanê de berê ercnayenê. Vanê ke DAÎŞî nê 33 ciwanê şorişgêrî ke waştêne Kobanê rê hetkarî bikerê, qetil kerdî. Nê ciwanî hetê dewleta tirke ra ameyî kiştene. Ma zaf hole zanê ke dewleta tirke û DAÎŞ yew ê  ke ê ciwanî hetê AKP û MÎTî ra ameyî qetilkerdene. Bi nê hêrişî ame waştene ke wa şar biterso û şarê Kobanê rê hetkarî mekero û verê têkoşînê demokrasî yê Vakurî bêro girewtene ke şarê kurdî û tirkî yewbînan ra bêro raqilnayene. No hêriş eynî wextî de destpêkê planê çokdayîşê bi. No hêriş leteyêkê konseptê qirkerdişî bi.

Îqtîdaro faşîst wazeno ke planê xo yê qikerdişî bi serkewtişî biqedîno ke kurdan qir bikerê. Hêzê dewlete zî seba ke îqtîdar hêrişê kurdan bikero her hetî ra paştî dano ci û vano ke eke ti kurdan qir bikerî eşkenî îqtîdar de bimanê. Xora teberê HDPyî de vera hukmatî muxalefet zî çîn o. CHP zî kişta îqtîdarî de ca gêno. Kurdan de serkeşîya PKKyî de têkoşîn û xoverdayîşê 40 serran esto. No seba kurdan qezencêko pîl o.

Tirkya de xora polîtîkaya tecawuzî yena rayraberdene. Na polîtîka Kurdîstan de pîya bi polîtîkaya qirkerdişî xidarêr bena. Kurdîstan warê xoverdayoxî sey hedef yenê girewtene. Botan mesela qeleya xoverdayîşî ya Kurdîstanî yo. Dêrsim merkezê xoverdayîşê yê tarîxê Kurdîstanî yo. Bi taybetî cinîyê rêxistinkerdeyî heme cinîyê kurdan hedef de yê. Vera Komeleya Cinîyan a Rosa û TJA hêrişê pîlî estî. Wazenê îradeyê cinîyan bişiknê ke wa vengê xo mevejê. Vera tecawuzan Kurdîstanî ra reaksîyonî estî la nêvejenê, kêm ê. Wextê Terteleyê Dêrsimî de seba ke cinîyêke rê hetê leşkeran ra tecawuz ame kerdene şarê Dêrsimî weriş payan ser. Nimûneyê winayên Kurdîstan de zaf ê. Cinî Dêrsim a, welat a.  Welatperwerîye, anor, şeref û ehlaq a. Kurdîstan de nê hêrişî plankerde yenê kerdene. Dewlete Kurdîstan de tecawuzkar a. Ganî heme hêzê Kurdîstanî cewabê nê tecawuzan û qirkerdişan ê dewleta tirke bidê. Ganî Kurdîstanî de her çîyê dewlete birijîyo û bêro vêşnayene. Ceza tecawuzkaran ganî cade cayê qewimîyayîşî de bêro dayene. Xora seba ke bi paştê dewlete nê hêrişan kenê mehkemeya dewlete de nînê cezakerdene. Şar ganî cezaya înan  bi destê xo bido.

Senî ke vera kurdan hêrişo topyekûn  esto ganî xoverdayîşê vera ci  zî topyekûn bo.  Eke ma vera nê hêrişan nika têkoşîn mekerê, ma do çi wext têkoşîn bikerê. Beno ke siba zaf erey bo. Semedê pawitişê erjanê xo ganî bedelê berê dayene. Beno ke 100 hezar şehîd bidî la amoyox yeno xelisnayene û welatêk beno azad. Eke to xo ver medî ameyox û welato azad vînî kenî/a, anor, azadîye û estbîyayîşê xo vînî kenî/a. Vera şerê qirkerdişî ganî xoverdayîş her hetî ra bêro kerdene. Têna gerîlyan rê verdayîş nêbeno. Ganî şarê ma paştî bido gerîlayan û mîyanê nê têkoşînî de ca bigêro.

Heftanîn de xoverdayîşêko biheybet esto. Ez xoverdayîşê gerîlayan selam kena û şehîdanê bi heskerdiş û hurmetî yad kena.  Xoverdayîşê qehremankî ameyî ciwîyayene û dewam kenê. Heme Başûr de xoverdayîş esto.  Reyna Vakur de, Botan de çalakîyî bihêzî yenê kerdene. Merkezê Pawitişî Şarî ê pîroz kerdî, ma zî pîroz kenê. Tirkîya wazena ke Rojawan û Başûrê Kurdîstanî zî îşxal bikero. Vanê problemê ma PKK yo.  Xora seba ke problemê ci bi kurdan esto vera PKKyî şer keno. Seba ke PKK semedê şarê kurdî xoverdayîş keno, dişmeno verên ê Tirkîya yo. Êyê ke semedê kurdan tay têkoşîn kenê ê zî dişmenê hurdî yê. Ganî her kes naye rind fam bikero ke seba ke dewleta tirke dişmenê kurdan a PKKyî rê dişmenîye kena.

Seba ke dewleta tirke wazena serrêka Kampa Multecîyan a Mexmûrî de ambargo esto. Nê kesê ke kampe de manenê xora hêrişê dewleta tirke ra remayî û semedê pawitişê anor  û şerefê xo ameyî tîya. Kam vîjdan, kame kurdîye û welatperwerîyê naye qebul keno. Ganî Parlamentoya Başûrî vera îşxalî tewirê xo ramojno û dewleta tirke ra vejê Başûrî ra veje. Xora şarê Başûrî tim bi pê çalakîyanê xo vera îşxalî sewedareno.

Amerîka ke wazena Rojahelatê Mîyanênî goreyê xo dîzayn bikero dewleta tirke şuxulnena. Lîbya de zî goreyê menfeatê xo paştî dana Tirkîya ke Rûsya ra dûrî tepiş o.  Coka artêşa çeteyan ê Tirkîya nêvînayîşî ra yena. Ê zî vanî vanê qey Amerîka raşta cayê înan de ya û xîyalanê osmanîyankîyan kenê. La na polîtîka pûç a. Lîbya nêdanê Tirkîya werdiş. Nika kewtî de vera xo de Misir dî, erebî bîyî yew û reaksîyonêko xurt vejîya meydan.  Amerîka û Rûsya goreyê menfeatê  xo Tirkîya şuxulnenê û wexto ke dewrê şuxulnayîşî qedîya destê xo ci ra anecenê. Îqtîdaro faşîst bêşik o ke do dersê xo bîgêro la çend îqtdar de bimano hendê hêrişê kurdan keno. Coka ganî xoverdayîş bêro pîlkerdene ke no rejîmê dîktatorîye bêro rijnayene.''