Newaya Jin sey her aşme na rey zî meseleyê muhîmî girewtî rojeva xo. Nînan ra tayê ci wina yî: Çalakîya Dadîyanê Şeme, krîzê ekonomîke, mergê qican, polîtîkaya maciran, qirkerdişê tebîetî û rewşa Sûrîye û Rojawanî.

‘CINÎBÎYAYÎŞÊ NEÇARÎYE’

Halîde Turkogluye nuşteyê xo de 16 serrê wextê hukmatê AKPyî de şar senî bîyo nêçar û tengayî anceno, girewta dest.

Rojda Yildirime qala zayendê krîzê ekonomîke kena û nuşteyê xo de babeta ‘cinîbîyayîşê neçarîye’ girewta dest.

‘XOPAWITIŞO EKONOMÎKE’

Nazan Ustundage zî dîyar kena ke krîzê ekonomîke tewr zaf cinîyan ser o tesîr kena û vera nêyî de eleqa ancena muhîmîya xopawotişê ekonomîke ser. Nuştoxa newe ya rojnameyî ra Çarçel Engîzeke zî bale ancena karê kooperatîfî yê ciniyanê Rojawanî ser.

‘WEXTÊ PÊSERAMEYÎŞÎ YO’

Mujgan Aslane zî derheqê çalakîya Dadîyanê Şeme de dosyayêk amade kerda. Nuşte de qala têkoşînê erjaye ke 27ê Gulana 1995î ra nata Rasteyê Galatasarayî de yeno dayene ser o ameyo vindetene.

Nuştoxanê newe ye rojnameyî ra Rûşen Celale zî vera rewşa xirabe ya welatî de pêşnîyazan kena û vana ‘wext wextê cipersayîş, vînayîşê demê neweyî û pêserameyîşî yo’. Zerya Gule zî vera ‘operasyonanê bêkokkerdişî’ de dîqet ancena merdimbîyayîşî de israrî ser.

Beşa çîyê ke çapemenîye ra ameyî weçînitişî de ca dîyayo meqaleya Candan Yildize. Meqale de şewatê daristanê Dêrsimî girîyayî dest.

'ALMANYA DE TEKOŞÎNÊ KURDAN’

Hemsereka KCDK-Eyî Fatoş Goksungure zî tekîlîya kurd û almanan ser o vinderta. Goksungure dîyar kena ke nasnemeyê kurdan her tim bîyo qurbanê îtîfaqê tirk û almanan. Goksungure daya zanayene ke têkoşînê kurdan yê 25 serran cepheyanê sosyalîst, antî-faşîst û şorişgêran ardo têhet û no têkoşîn Almanya eciz keno.

‘OMIDÊ KE AWA XORÎNE DE VÎNÎ BÎYÎ’

Done Guzele bi temsîlkara AvEG -Konî Şafak Arabaciye reyde rewşa maciran ser o qisey kerda. Polîtîkaya maciran û bitaybetî zî çîyê ke macirê cinîyî ancenê ser o tayê melumatî yenî dayene.

‘TIRKIYA DE QETILKERDIŞÊ QICAN’

Esra Çîftçîye zî Tirkîya de qetilkerdiş û îstîsmaro cînsî yê qican girewto dest. Çîftçî vana ‘eke qetilkarê Ceylan Onkole û Ugur Kaymazî ra wextê ci de hesab biameyêne persayene, ewro Leyla û Eylule nêameyênê qetil kerdene’. Eynî babete ser o Vîldan Dîrîke zî dîyar kerde ke pîlî her mergê qican ra berpirsîyar î.

Turkan Aslane zî bîyografîya cinîyêka xoverdakare, dadîya kurde Edîbe Aslane dana naskerdene. Reyna xeylê nuşteyê vîrardişî, portreyê cinîyê xoverdayoxî, roportaj û dosyayî hûmara êlule de ca gênê.