Yewîya Heqanê Merdiman a Mîyanneteweyîye (IGFM) seba ke sîyasetmedara kurde Gulsere Yildirima ke serra 2016î ra nata tepişte ya bêra veradayene kewte mîyanê têgêrayîşî. IGFMyî hewteyê vîyarteyî de bi wesîleya Roja Dadîyan Gulsere Yildirim zî tede 5 cinîyê tepişteyî sey 'cinîyanê tewr çêran' îlan kerdî. 

 4ê teşrîna peyêna 2016î de pê îdîaya ''endamîya rêxistine'' cezaya zîndanî ya 7 serr û 6 mengan dabî Gulsere Erdogan. IGFMyî Serekkomarê Tirkîya Erdoganî rê 11ê gulane de mektubêk erşawit û waşt ke Gulsere Yildirim wa bêra veradayene. Mektubo ke hetê îdarekarê IGFMyî Vasilis Pavegosî ra ame îmzakerdene, keyepelê dezgehî de ame weşanayene.

Mektub de wina ame vatene: ''Rîyê vîrusê Korona ra şertê zîndanî bîyî giran. Ma wazenê ke dadîya 4 domanan Gulsere Yildirim bêra veradayene.'' Mektub de ame vîrvistene ke Gulsere Yildirim serranê 2011 û 2015î de wekîlîya Mêrdînî kerde û venga Erdoganî ame kerdene ke ''Welatê xo de demokrasî bîyarê ca.''

Mektub de ame îfadekerdene ke eke Tirkîya demokrasî bîyara ca eşkena do biba partnerêka Ewropa û veradayîşê tepişteyan ê sîyasîyan û ê Gulsere Yildirim beno ke destpêkê ney bibo.