Yewîya Parlamenteran a Mîyan-newteweyîye (IPU) û Meclîsa Parlamenteran a Konseya Ewropa (PACE) netîceyê cigeyrayîşo ke halê cinîyan yê meclîsanê Ewropa ser o hetê têgêrayîşê MeTooyî ra amebi kerdene eşkera kerdî.   

IPUyî ard ziwan ke cinîyê parlamenterî yê ke meclîsanê Ewropa de yê bi hawayêkê cidîyî raştê îstîsmarê cinsî û şidetî yenê.

 ‘SE RA 85 RAŞTÊ ŞIDETÊ PSÎKOLOJÎKÎ YENO’

Ame dîyarkerdene ke „xebate 45  welatanê Ewropa de 123 cinîyan ser o ameya kerdene, nînan ra 81ê ci parlamenter, 42 zî xebatakarê cinîyî yê ke meclîsan de xebetêne.“    

SE RA 47 BI MERGÎ AMEYÎ TEHDÎTKERDENE

Cinîyê ke înan dir ame qiseykerdene se ra 47ê înan ard ziwan ke bi merg, tecawuz û şidetî ameyê tehdîtkerdene, se ra 68ê înan vat ke rîyê asayîşê înan ê fîzîkkîyî ra û cilanê înan ra raştê vatişanê cinsî yê xiraban ameyê. Se ra 25ê înan zî ard ziwan ke raşte raşt maruzê şidetê cinsîyî bîyê. 

SEREKA IPU: ENDÎŞEDAR O

Sereka serewextî ya IPUyî Gavrîela Cuevase ard ziwan ke a sey parlamenterêka cinî netîceyê ke rapor de ameyê parekerdene ver ra endîşedar a. Gavrîelaye vat: „Tacîzê hemverê cinîyan tenya bi hawayêkê cidîyî binpaykerdişê heqanê cinîyan nêyo, heman wextî de demokrasî rê zî zirarêkê pîlî dano.“  

SEREKA PACE: MA EŞKENÊ NA RAŞTÎYA DECINE BIVURNÊ

Sereka serewextî ya PACEyî Lîlîane Maury Pasquîere zî wina vat: „Çi heyf ke na xebate raştîyêka decine ramojnena ma. Heta têduştîya mîyanê mêrde û cinî dewam bikero, tu cinîyêk do nêeşko xo şidet û tacîzî ra bipawo. Labelê ma parlamenterê cinî û mêrdeyî bi mucadele eşkenê na raştîya decine bivurnê.“