Janî darbêka girane daye heqanê cinîyan ro

Netîceya vîrusê Korona de yeno dîyene ke janî tewr zêde tesîrê heqanê cinîyan kerd. Bi taybetî welatanê sey DYA de darbêka girane daye heqanê cinîyan ro.

Menga nîsane de Neteweyanê Yewbîyayeyan raporek amade kerdbi û pare kerdb, ke vîrusê Korona tewr zêde tesîrê heqanê cinîyan do bikero û seba pawitişê heqanê cinîyan welatê endamî hîşyar kerdbî. La aseno ke zaf welatan goş nêda na hîşyarîye.

Wextanê krîz û janî de tim hêverî cinîyî mexdûr benê. La prosesê vîrusê Korona de vejîya werte ke pêro cinî û camêrdê dinya sey ci nîyê.

Bi taybetî DYA de cinîyî xeylêk heqanê xo ra benê. Înan ra yew zî heqê kurtajî yo. Eyaletanê DYA de pê biranê bêqanûnîyan verê heqê kurtajî yeno girewtene. Eyaletan îdîa kerd ke wextê janî de ê seba tasarruf û xopaiwtişî na bire anê ca.

Profesora Huqûqî ya Zanîngehê Florida Marye Ziegler na bire bi xurtî rexne kerde û vat: ''Janî ra verî zî ame waştene ke verê kurtajî bêro girewtene. Nika jan kenê bahane.''

Na bire DYA de tesîrê zaf cinîyan kerd. Seba ke cinîyî nê prosesî de tim keye de yê tim maruzê şîdetê camêrdan manenê.

Zanîngehê Simon Fraserî yê Kanada 5 jananê 20 serran ê peyênan ser o cigêrayîşêk kerdbi. Goreyê netîceya cigêrayîşî cinîyî û camêrdî pîya bêkar bimanê zî cinîya goreyê camêrdan hîna erey kar vînenê.