Konferansê Cinîyan ê Mîyanneteweyî yê 2. yo ke pê şîarê ''Şorişê ma: Azadkerdişê cuye yo'' hetê Torra Cinîyî Ameyoxî Munenê ra ame serûberkerdene netîcenameyê xo eşkera kerd û konferans de Torra Jin, Jiyan, Azadî: Cinîyî Azadîya Xo Mûnenê'' ameye îlankerdene. 

Netîcename de ame vatene ke di rojê konferansî bi beşdarîya 800 delegeyanê her hetê dinya bi coşî qedîyayî.  Netîcename wina dewam keno: ''Nê rojanê konferansê ma de Jin, Jiyan, Azadî  sey sloganê serewedaritiş û çareserîye her cayê dinya de yeno berzkerdene. Cinîyî seba ke seserra 21. bikerê seserra cinîyan payan ser de yê. 

Sîstemo kapîtalîst pê xerakerdişê ekolojîk, pandemî, werdişê kede û şîdetî dinya ver bi şerê dinya yê 3. beno. Ma ney rê vanê ney. Ma seba vindarnayîşê nê ferasetî îlan kenê ke seba cuyêka azade û edîle ma xo her kesî rê mesuldar vînenê, ma do bibê serkêşanê awankerdişê sîstemo ke hesreta ma ya. Wa erd, adir, awe û hew ma reyde bê!

Ma her cayê dinya de vat 'Ni Uno Menos, 'Me too', bi reqsê Las Tesîsî xo rêxistin kerd. Ma vejîyayî kuçeyan. Cinîyî bi hêzê başkerdişî yê xozayî payan ser de vindenê, ameyoxî ser o xeyalan kenê. Ma vera mîlîtarîzm, nîjadpestî, kolonyalîzm, serdestîya camêrdan, şîrketanê kapîtalîstan û dewletan vejîyenê waran. Coka ma ra tersenê. 

Hêzanê rejîmê Îranî Jîna Emînî, dewleta tirke ya faşîste embaza ma NAgîhane Akarsel ma ra girewtî berdî. Amerîkaya Latînî de serkêşê cinîyî yê herême yenê qetilkerdene. Sûdan, Yemen û Amerîka de cinîyî tepişîyenê, kişîyenê û raştê tecawuzî yenê. Ma îfadeyê xoverdayîşê înan ê. 

Ma şahidê ci yê ke tecrubeyê têkoşînê cinîyan hînî seserra 21. de resayî astêka cîya. Ma hêrsbîyaye yê û no hêrs kolektîf o. Ma bihêz ê, ma do dinya bivurnê. Ma dewrêkê têkoşînê azadîye de yê ke şorişê cinîyan ci rê serkêşîye keno. Seke Birêz Abdullah Ocalanî vatbi cuya ke hesreta ci ancîyena pê mucîzeyan nê pê şorişî awan bena. Ma Kurdîstan, Îran, Afganîstan, Amerîkaya Latîne û Ewropa de seba na cuye wurzenê we û têkoşîn kenê.

Ma benê 'xo', nameyanê ke kapîtalîzm, kolonyalîzm û serdestîya camêrdan dayê ma red kenê û nameyanê xo bi xo weçînenê. 

Hînî ma wextê cinîyan de yê. Cewabo tewr girîng ê nê dewrî zî têkoşîno hempar ê cinîyan û mendekerdişê torra yewîye û paştdayîşî yo. Bi wesîleya nê konferansî ma 'Jin, Jiyan Azadî: Torra Cinîyî Ameyoxî Mûnenê' îlan kenê. Dima ma do xerîtaya xo ya rayîrî ser o nîqaş bikerê. Ma venga pêro cinîyan danê ke tewrê torra ma bibê û esasê 'Şorişê Cinîyan' ser de têkoşînê hemparî geş bikerê.''