Konferansê Cinîyan ê Mîyanneteweyî yê 2. yo ke pê şîarê ''Şorişê ma: Azadkerdişê cuye yo'' hetê Torra Cinîyî Ameyoxî Mûnenê ra ame serûberkerdene, roja 2. de dewam kerd.

Konferans de Kader ortakaya ya ke 2014 de gama ke semedê paştdayîşê Kobenê sînor de nobete tepiştêne hetê dewleta tirke ra ameye qetilkerdene, a zî ameye yadkerdene. Reyna Şebnenê Korur Fîncanci ya ke seba ke vera şuxulnayîşê çekanê kîmyewîyan eşkerayîye daye û ame tepiştene û heme tepişteyanê sîyasîyan rê selamî ameyî şawitene. Konferasê ke pê vîdeoyê KJARî dest pê kerd de sloganê sey "Jin Jiyan Azadî", "Bijî Serok Apo" û "Bijî Berxwedana Gerîla"  ameyî eştene.

Qiseykerdişê akerdişî hetê moderator nuştox-aktîvîste Rahîla Gupta ka Îngîlîstanî ra tewrê konfenransî bîye ame kerdene. Gupta vat: ''Ma cinîyî pê mucîzeyan nê pê şorişê eşkenê biresê waştişanê xo. Mabênê şerê Sûrîye de şorişê sey Şorişê Rojawanî qewimîya û heme dinya rê bi îlham. Cinîyan pê felsefeya Rayberê Şarê Kurdî Abdullah Ocalanî Şorişê Rojawanî kerd.''

Sosyologe Dilara Dîrîk zî vat: ''Vera faşîzmî têkoşînê azadîye yê cinîyan girdêr beno.  Ewro kenê ke zereyê slogananê şorişgêran veng bikerê. Dezgehê se CIA û NATO senî ke paştî bidê cinîyan reklaman kenê. Mesela Hollywood de pê slogana Jin jîyan azadîye ca dîyeno cinîyan ê kurdan la hetê bînî ra paştdî dîyeno hêrişanê kîmyewîyan ke gerîlayan qetil keno. Tirkîya rîyo raşt yê NATOyî yo. Mesela Hevrîne Xelef Sûrîye de pê patdayîşê NATOyî ameye qetilkerdene. Wezîra almane zî vana Jin jîyan azadîye la paştî danê hêrişan û polîtîkayanê ci yê vera cinîyan ê Tirkîya.''

Dr. Anjala al – Maamarîya ke bi nameyê Merkezê Cigêrayîşanê Stratejîkan ê Paştdayîşê Domanan û Cinîyan bale ante zehmatanê ke cinîyî Yemen de ancenê ser.

Têgêrayîşê NiUnaMenosî ra nuştox-rojnamegere û femînîste Marta Dîlon zî vat: ''Ma tornê Dayîkanê Plaza de Mayo yê ke Amerîkaya Latîne de gêrayanê esteyanê gerîlayan û domananê xo ke ameyî qetilkerdene. Ma eynî wextî de hemrayê gerîlayanê ke koyanê Kurdîstanî de yê.''

Akamdemîya Jineolojî ra Elîfe Kaya zî Nagîhane Akarsel yad ker û şexsê Şebneme Korur Fîncanci de heme tepişteyanê sîyasîyan rê selam şewitî û qala şorişê cinîyan ê kurdan kerd.

Aktîvîsta femînîste û profesorê felsefe Jules Falqueta ke Fransa ra tewrê konferansî bîye bale ante rewşa cinîyan ê macîran ser.

Badê mabênî beşê 2. de moderatorîye hetê fîlmviraştoxe Benedetta Argentieri ya ke Îtalya ra tewrê konferasî bîye ra ameye kerdene.

Reyna aktîvîsta TJA Denîze Abukan derheqê têkoşînê cinîyan ê Vakurê Kurdîstanî de, Hemsereka PYDyî Asya Abdullah zî derheqê têkoşînê cinîyan ê Rojawanî de qisey kerd.

Hezê Şengal zi bi vîdeoyêkî tewrê konferansî bîyî derheqê rewşa cinîyan ê êzidîyan qisey kerd û vat têna gerîlayanê HPG û YJA Starî êzidîyî pawitî.