Konferansê Cinîyan o Mîyanneteweyî yo 2. hetê Torra Cinîyî Ameyoxî Vurnenê ra bi sloganê 'Şorişê ma: Azadkerdişê Cuye', 5-6ê teşrîna peyêne de Zanîngehê Teknîkî yê Berlinî de do bêro kerdene. 41 welatan ra 800 delegeyî do tewrê konferansî bibê. Endama Komîteya Amadekarîye Songule Karabulut derheqê babete de ANFyî rê qisey kerd.

Songule Karabulut derheqê amadekarîyanê konferansî de vat: ''Amadekarîyê ma temam ê. 8 ziwanan de konferans de açarnayîşo simultane do bêro kerdene. Malzemeyê teknîkî hê ronîyenê. Goreyê plansazîya ma saete 09.00 de dest pêbikerê.''

Songule Karabulut ard ziwan ke azadîya cinîyan, şorişê cinîyan yeno manaya azadîye cuye û vat: ''Wexto ke Îran û Rojhelatê Kurdîstanî de serewedaritişî dest pêkerd sloganê 'jin, jiyan, azadî' her cayî ra vila bi. Şorişê cinîyan vera sîstemê kapîtalîstî esas o. Goreyê ma şorişê cinîyan hêzo bingeyî yê çareserkerdişê pêro meseleyan o. Vera sîstemê kolonyalîstî azadîya cinîyan yeno manaya azadîya cuye coka ma no şîar xo rê weçîna. Ma rê rewşa cinîyan ê Afganîstanî zaf girîng a. Cinîyê afganî nika vera Talibanî bi tecrubeyanê cinîyan ê kurdan têgêrenê.

Îran û Rojhelatê Kurdîstanî de zî rewşe heman a. Goreyê konferansê ma yê 2018î rewşa nikayêne ya cinîyan hîna cîya ya. Coka ma konferansê xo de têna analîzê sîstemî nêkerê. Ma do rayîr û metodanê azadîye ser o zî nîqaşan bikerê. Ma armanc kenê ke cewab bidê prosesê nikayênî. ''

Karabulute da zanayene ke kanalê sey Jin TV, Stêrk TVyî konferansê înan bi hawayêkê gandarî do biweşanê û vat: ''Ma do înternetî ser o zî weşanê gandarî bikerê. Coka ma wazenê her kes nê konferansî wa teqîb bikero. Ma dewrê înternetî de yê, dûrbîyayîş hînî bêmana yo. Ma eşkenê her cayê dinya de bi ruhê xo bibê yew. Ma eşkenê kelecanê konferansî pîya biciwîyê.''