Torra 'Cinîyî Ameyoxî Awan Kenê' bi beşdarîya delegeyanê xo yê 41 welatan Konferansê Cinîyan ê Mîyanneteweyî paytextê Almanya Berlin de do bikera. Konferans mabênê 5-6ê teşrîna peyêne de Zanîngehê Berlinî de do bêro kerdene. Endama Akdemîya Jineolojî û amadekaranê konferansî ra Haskare Kirmizigul derheqê babete de ANFyî rê qisey kerd.

Haskare da zanayene ke konferans de têgêrayîşê cinîyan ê Amerîkaya Latîne, Rojhelatê Mîyanênî, Asya û Ewropa amade bibê û vat: ''Konferans armanc keno ke vera sîstemê serdestîya camêrdan û modernîteya kapîtalîste yewîya cinîyan bîyaro ca û seba têkoşînê cinîyan enerjîye kom bikero. 41 welatan ra 800 cinîyan seba beşdarîya konferansî qeydê xo viraşt. Cinîyê Sûdan, Yemen, Hindistan, Fîlîpîn, Guatemala, Kolombiya, Arjantîn, Afganîstan, Filîstîn, Balkanî do tewrê konferansî bibê.''

Haskare pare kerd ke cinîyê dinya bi taybetî wazenê tecrubeyanê têkoşînê cinîyan ê kurdan ra îstîfade bikerê û konferans de bi sernameyê 'jin, jiyan, azadî' zî beşêk est o. Haskare vat: ''Na felsefe bingeyê xoverdayîş û têkoşînê cinîyan o ke efsûnî ya. Ma do bi 20 ziwanan pankarta 'jin, jiyan, azadî' amade kerde û do salona konferansî de bidaliqnê. Ma konferans de xebatanê cinîyan, ekonomî-debara cinîyan, sîstem, komun û koperatîfanê cinîyan zî nîqaş bikerê. Konferansê ma de atolyeyî zî est ê. Reyna konferans de cinîyî tecrubeyanê xo yê serê Jineolojî bîyarê ziwan. Têna amadekarîyanê nê konferansî de zî hêzê cinîyan xo eşkera kerd. Ez pê bawer a ke konferans bi hawayêkê serkewteyî biqedo, hêvîyêka pîle biaferno û îdîayêka pîle vejo werte.''