Hemsereka pêroyî ya ÎHDyî Erene Keskîn îfade ker dke betalkerdişê Peymana Îstanbulî bi hawayêkê eşkerayî yeno manaya meşrûkerdişê şîdetê vera cinîyan. Keskîne vat ke na peymane dewayanê şîdetî de sey referans yena dayene.

Keskîne derheqê bêcezaveradayîşê şîdetî de zî nê çîyî vatî: ''Heta 2005î Qanûnê Ceza ya Tirkî de seba şîdetê vera cinîyan sernameyêke zî çinbi. Peymana Îstanbulî wazena erjê feodalan, serdestîya camêrdan û hîşmendîya namusî bêrê persayene. Coka îqtîdar wazeno na peymane wedaro. Peymana Îstanbulî seba cinîyan vera şîdetî qanûno bingeyî yo. Cinîye na peymane rixmê hende cîmayetan û şîdetî viste destî û do qet cira fek vera nêdê.''

Nê wextanê peyênan de Kurdîstan de tacîz û tecawuzê cinîyan zêdîyayî. Keskîne derheqê mesele de nê çîyî vatî: ''Na rewşêka newîye nîya. Têkoşînê cinîya zêdêr dejîn bi û bi rayîrê medyaya komelkîye şîdetê vera cinîyan zêdêr verê çiman de yo. Serranê 90an de hêrişê cînsî yê vera doman û cinîyan zêde bibî. Sey Êlihî serranê 90an de zî tek sebebê kişîyayîşê cinîyan hêrişê cînsîyî bîyî û nê hêrişî pê destê dewlete ameyêne kerdene.''

Keskîne peynî de vat ke têkoşînê cinîyan têkoşîno verên ê na cografya yo û cinîyî do heq û têkoşînê xo ra fek vera nêdê.