Wan de serebûtê kişîyayîşê cinîyan serrêke de zêdîyayî. Sereka Komeleya Cinîyan a Starî ya Wanî Serape Guvenç ard ziwan ke derheqê serebûtanê kişîyayîşê cinîyan de tay zanayîşî dayî û pare kerd ke camêrdî seba ke serwerîya înan dewam bikera tedaya cinîyan kenê. Serape vat: ''Şîdetê vera cinîyan her ca de benê sebebê mergî. Tirkîya de (Vakurê Kurdîstanî zî tede) serra 2019î de 474 cinîyî, 6 menganê 2020î de zî 25 cinîyî kişîyayî. Wan de serrêke de 22 cinîyî ameyî qetilkerdene. Ame îdîakerdene ke 7 cinîyan xo kişt. La goreyê ma nê cinîyan xo nêkişt, ê kişîyayî.

Wan de çen serebûtê xokiştişan ê şikdaran ê serra peyêne:

Canane Akar 2ê hezîrana 2019î de qezaya Payîzava ya Wanî de bi hawayêkê şikdarî xo kişt. Canane 19 serre û zewijnaye bîye.

Sîbele Varli 23 serre bîye û dadîya domanêke bîye. 14ê hezîrana 2019î de qezaya Erdîşî ya Wanî de ame îdîakerdene ke Emîne xo kişta. Cinîya ciwane semedo ke mêrdeyê ci ci rê şîdet kerdêne waştêne cîya biba.

Suphane Boza 26 serre qezaya Tûşbaya Wanî de 31ê çeleyê 2020î de bi hawayêkê şikdarî xo kişt. Ame zanayene ke Suphane zewijnaye bîye û mêrdeyê aye ci rê şîdet kerdêne. 

Gulaye Elçî qezaya Rêya Armûşî de 20ê sibata 2020î de keye de xo kişt. 

Hacere Metîna 23 serre Rêya Armûşî de 2ê nîsana 2020î de xo kişt. Mêrdeyê ci ame destbendkerdene û îfadedayîşî ra dima vera dîya. 

N.A. Rêya Armûşî de 17ê nîsane de pê çekêke xo kişt.

Cerene atli 9ê gulane de qezaya Qelqelî de pê çeke xo kişt.