Koordînasyonê KJKyî derheqê hêrişê vera Mexmûr û Zinê Wertê yê de eşkerayîyêke daye û vat no hêkişêko hîra yo.

KJKyî sere de şehîdê Mexmûrî yad kerdî û nê vatî: ''Îqtîdarê AKP-MHPyî yo ke rojê vîrusê Korona sey firsendî şuxulneno dimayê hêriş û îşxalanê neweyan de yo. Dima ke leşkerê PDYî Zinê Wertê de ameyî cakerdene operasyonê artêşa tirke ya îşxalkere zêdîyayî. No çîyêko tesaduf nêyo. Goreyê eşkerayîya Wezîrîya Peşmergeyan hêzê înan rîyê Korona ra ûca de yê la raştî de wina nîyo. No sewqîyat semedê pawitişê weşîye nîyo, cuya tehdît keno. Bi nê sewqîyetî mabênê partîyanê sîyasîyan de rîskê pêkewtişî zêdîya û hêrişanê vera cayê roniştişî de merdimî ameyî qetilkerdene.

Eke PDKyî raşt bivatêne YNK vera înan nêvejîyayêne. Cayo ke kontrolê YNKyî de yo hêzo ke bigiranî yê PDKyî yo tede ameyo cakerdene. No elemetê xeyrî nîyo. Dima ke no hêz herêma Qendîlî de ame cakerdene hêrişê vera Têgêrayîşê Azadîye û sewqîyatê artêşa tirke yê vera Başûrê Kurdîstanî zêdîyayî. Xora semedê têkoşînê vera Korona yew hêzo leşkerî bêro qilêko stratejîk de xo ca bikero, mantixê ci çîn o. Eşkerayo ke nê gamê ver bi prosesê bitehluke yê û ganî rayapêroyî na raştîye rind fam bikero.

Ma heta ewro dîyo ke pêkwtişanê mabênê kurdan ra şarê kurdî senî dejê xorî antê. Dişmenê ma wazeno ke Têgêrayîşê Azadîye yê Kurdan tasfîye bikero. Semedê naye zî partîyanê kurdan ra paştî gêno û înan dir plananê leyminan keno. Ganî partîyê sîyasîyî yê kurdan nê kayanê xirabinan de xo medê şuxulnayene. Partîyê ke vera kurdan tê bigêre do ne tarîx ne zî şarê ma înan êfu bikero.

Kampa Mexmûr ya ke 12 hezar sivîlî tede ciwîyenê 9 aşmî yo ke hetê PDKyî ra binê ablûqa de ya. Bi nê ambargoyî şar yeno cezakerdene. Hetê bînî ra zî artêşa tirke kampe ser o bombayan varnena şarê herême qetil kena.  Dişmen Korona sey firsendî şuxulneno û hêriş keno ganî vera naye ma zî vengê xo berz bikerê. Ma tedbîranê Korona ra bêveng memanê. Çalakîye de sînor  çîno ganî rayîrêk bêro vînayene ke vera nê hêrişan sare wedarîyo.''