Koordînasyonê KJKyî Seda Feysel El-Hermez û Hinde Latif El-Xidir ê ke ameyî qetilkerdene eşkerayîya nuştkîye daye.

Eşkerayîye de nê ameyî vatene:

''Cinîyê serkêşî Seda Feysel El-Hermez û Hinde Latif El-Xidir 22ê çeleyî de kantonê Hesekê de ameyî qetilkerdene. Ma hemrayanê xo bihurmet yad kenê, keye û hemrayanê înan ê têkoşînî rê serweşîye wazenê. Ma do vîrê înan rê girêdaye têkoşînê xo bi serkewtişî tacîdar bikerê.

DAÎŞ û dewleta tirka ke peyê ci de ya bi nê qirkerdişê wehşîyî waşt ke mesajêk bido cinîyan ê Rojhelatê Mîyanênî ke heme dormeyê îdeolojîya xelisyayîşî ya Rayber Apoyî de ameyî têhet. Rojawan bîyo merkezê rêxistinbîyayîşî. Cinîyê ereb, kurd, tirk û suryanî pêro pîya ronayîşê netewa demokratîke de serkêşîye kenê. Şorişê Rojawanî netîceya keda nê cinîyan de bi şorişêk û îlham da heme cinîyan ê dinya. Cinîya rêxistinkerde bîye sebebê tersê sîstemê nêrîyî. Coka hêrişî bi hewayêkê sîstemkî yenê kerdene.

Sere de îqtîdarê AKPyî yo faşîst û maşaya ci DAÎŞ tim û tim cinîyan ê rêxistinkerdeyan hedef genê. DAÎŞ bi seyan cinîyî remnayî sey carîyeyan şuxulnayî. Şerê Serekanî de Hevrîne Xelef bi tewirêkê wehşîyî ameye qetilkerdene. Tewr peynî de zî Hemsereka Meclîsê Til El Şayîrî yê Kantonê Hesekê Seda Feysel El Hermas û Hetkara ci Hinde El Xidar zanaye ameyî hedefgirewtene. Zîhnîyeto faşîst pê nê hêrişan wazeno ke cinîyan ê Rojhelatê Mîyanênî têkoşînî ra raqilno.

Reyna yeno waştene ke verê îtîfaqê ereb-kurdî ke ruhê ronayîşê netewa demokratîke yo bêro girewtene. Potansîyelê nê îtîfaqî esto ke Rojhelatê Mîyanên de xeylêk dengeyanê sîstemkî ser û bin bikero. Coka no îtîfaq înan tersneno. Her çikas sîstemê camêrdî nê yewbîyayîşî perçe bikero zî wayîya cinîyan her roje pîlêr bena. 

Ma cinîyî nê qirkerdişan Paris û Silopî ra zanê. Cinîyê vera nê hêrişan peyser game nêerzene. Vera hêrişan her cade vejîyenê meydanan de û têkoşînî cewabê înan danê. Ma zî do tim vera qirkerdişan komelî bipawê. Ma veng danê heme cinîyan ke wa semedê averberdişê yewîya cinîyan a Rojhelatê Mîyanênî çalakîyan de cayê xo bîgerê. Çalakîyê ke semedê hemra Seda û Hinde yenê kerdene ganî bêrê wayîrvejîyayene.''