KJK: Şorişê Rojawanî şorişê cinî yo

KJK: Şer û mucadeleyê xobîyayîşî ke no 40 serrî ra vêşêr o çar perçeyanê Kurdistanî de dewam keno, bi na manaya xo perçeyê Rojawanî de vejîyayo werte.  

Koordînasyonê KJK’yî bi wesîleya serrgêra 8’ine ya Şorişê Rojawanî eşkerayî daye û vat, “Şorişê Rojawanî hewna sere de ganî xebatanê hişmendîye bikero. Çunke bîyayîşê şorişî her tim zereyê xo de qewimîyayîş, vurayîş û pîlbîyayîşî hewêneno. Qewimîyayîşê ke virazênê, gamê ke yenê eştene wesf û dewamîya şorişî bewlî kenê.”

Koordînasyonê KJK’yî ke eşkerayîyêka nuştekîye daye wina vat: “Ma serrgêra 8’ine ya ke 19’ê Temmuz a 2012’î de Rojawan ra dest pêkerde pîroz kenê. Bi na manaya xo, sere de afernayoxo rastekên ê şorişî, serkêşê şorişê Rojawanî Rayberîya xo rê pîroz kenê. Ma serrgêra şorişî de verê şehîdanê xo yê pîrozan de, ke îmkanê cuya bianore ya şaran afernayî, seba awankerdişê cimatêkê wayîrê nasnameyî, wesfî û cewherî bi hawayêkê fedaîyî û bi qehremanî şer kerd û erdê xo bi can û gonîya xo pawit, xo bi hurmet namnenê. Ma serrgêra şorişî heme şaranê ke bi serran o mîyanê şertanê şerî de, bi îrade xover danê, bi heme îmkananê xo şorişî rê wayîr vejênê, pîroz kenê û ma merheleyanê bînan ê şorişî de seba înan umîdê serkewtişî kenê.

Seserra 21’ine de ke serkêşîya cinî şên bîya û sey demê xoverdayîşê şaran amîya bewlîkerdene, Şorişê Rojawanî game bi game xo mûneno û xebatê awankerdişê sîstemê alternatîfî zî dewam kenê. Qewimîyayîşê ke Rojawan û Vakurê Sûrîye de virazênê, dorê perspektîfê cimatê demokratîkî de, neteweyê demokratîkî ver bi awankerdişê sîstemê demokratîkî benê. Xusûsen cigêrayîş û modelê çareserîye yê Kurdan, tecrubeyê mucadeleyî yê tarîxî ra heta roja ma mîraz girewto û weameyo. Bi na manaya xo, wendişê serê tarîxî yê ke tede xeylî dersî estê, seba ke şaro Kurd sîstemê dewletperwer û merkezê kapîtalîstî yê serwerî bêtesîr verdo, do hetkar bo.

Xorîbîyayîşê sîstemî yê Rayberê Şarê Kurdî, ercnayîşê ê û pêşnîyarê ê yê pratîkî yê çareserîyanê alternatîfan, seba Şarê Kurdî û şaranê Rojakewtena Mîyanêne şansêk o. na çarçewa de paradîgmaya Rayberîya ma, ya komunal, demokratîk, ekolojîke û azadîperwerîya cinîya seba Kurdan û şaranê Rojakewtena Mîyanêne, seba şaranê dinya do xizmetêk bikero û vurayîşî xo reyde bîyaro.

Ma bawer ê ke do şaro Kurd ê Rojawanî û şarê Vakurê Sûrîye nê destkewteyan rê wayîr vejîyê. Heme destkewteyê ke bi serkêşîya cinîyan ameyê destfînayene bala şaranê dinya ancenê, xebatê xopawitişî, ekonomî, weşîye, perwerdeyî, kulturî yê ke bi serkêşîya cinîyan yenê kerdene, do destkewteyanê pîlan bifînê dest. Rayberîya ma vat ke şorişê Rojawanî, şorişê cinîyan o. Bi nê hetê xo bala şaranê herême û şaranê dinya anta. No hetê êyo xoser o.

Serê şorişî ra nata çeteyanê ke dewleta Tirkî hetkarî dayêne bi înan, hêriş kerd. Dewleta Tirkî sere nameyê ‘ez sînorê xo pawena’ de xeylî reyan hêriş kerd û her roje nê hêrişanê xo domnena. Na yewe ra zî her game ra vêşêr ganî cinî, ciwan û heme beşê cimatî şorişê Rojawanî bipawê û vernîya îşxalkarîye bigêrê. Ma veng danê şarê xo yê kedkar, fedakarî ke hemverê îşxalkarîye de tewirê xo ramojnê. Nê prosesî de xebatanê pawitiş, xurtkerdiş û pîlkerdişê şorişî de ganî ma bi ruhê seferberîye tewrê prosesî bibê.”