Koordînasyonê KJKyî derheqê şehadetê Raperîne Amed (Delal Azîzoglu) mesajêk weşana.

Mesajê KJKyî wina yo:

‘‘17ê hezîrane 2022î de Herêmanê Pawitişî yê Medya de, kadroyanê serkêş ê têgêrayîşê azadîye yê cinîyan ê Kurdîstanî ra Embaza ma Raperîne Amed hêrîşê hewayî yê dewlete tirke ya faşîste de şehîd bîye.

Hemraya ma Raperîne serra 1992î de kela ma ya xoverdayîşî Amedî ra beşdarê refanê gerîlayan bîye. Dimayê ke perwerdeyê Rayberîye girewt, waranê cîya-cîyayan ra têkoşînê ma xo rê kerd wezîfeyêk. Tewr peynî sey endama raybertîye yê Dîwanê KONGRA GEL karê xeylê muhîmî û tarîxî kerdî, serkêşîye kerde. Wexto ke nê karî kerdêne, şehîd bîye.

 ‘Bi zerrî û can têkoşîn kerdêne’

Embaza ma Raperîne çar parçeyê Kurdîstanî ra, Ewropa ra seba şarê ma, seba îdareyê şarê ma xeylê xebitîya. Cuya aye de her tim durust û serewedarite bîye, nê xo rê kerdbî esasêk. Hemraye Raperîne  demanê peyênan de bi perwerde, kombîyayîş û munaqeşayan beşdarê xebatan bîyêne ke seba averberdişê sîstemê konderal ê demokratîk û modelê netewa demokratîke xebitîyayêne.

Bi aqil, hîs û rengê cinî, bi hemrayîya xo, bi vindertişê xo yê binîzam, zerrîtenikîya xo mîyanê cuye de û her warî de tesîrêko gird kerd, bi zerrî û can beşdarê rêxistinanê komelkîyan bîyêne.

Bi nameyê Têgêrayîşê Cinîyan ê Kurdan, şexsê Raperîne Amed de heme şehîdanê xo bihurmet yad kenê û ma sozo ke dayo şarê xo anê vîrê şarê xo.’’