Koordînasyonê KJKyî derheqê hêrişê îşxalî yê dewleta tirke yê vera Başûrê Kurdîstanî de eşkerayîye daye û nê pare kerdî:

''Dewleta tirke ya îşxalkere vera Kurdîstanî her hetî ra hêrişan kena. Îqtîdarê AKP-MHPyî yo ke dişmenê kurdê/a azadî/e yo  şero topyekun dayo destpêkerdene. Dewleta tirke seba ke kurdan bikero bêîrade çîyo ke destê ci ra yeno kena. No şer sey dewamê komployê mîyanneteweyî yê vera Rayberîya ma û planê çokdayîşî yeno domnayene. Faşîzmê îqtîdarê faşîstî ke bi serran o vera şarê ma, têgêrayîşê û cinîyan bi zîhnîyetê qirkerdişî nêzdî beno hinî hêrişan de sînor nas nêkeno.  2019 de hêrişê îşxalî yê vera Herêmanê Pawitişî yê Medya yo ke Xakurkê de dest pê kerd Heftanîn, Garê, Metîna, Zap û Zagrosan de dewem kerd. Hêrişê ke 17ê nîsane de dest pêkerd no zî dewamê nê planê îşxalî yo. Gerîlayî seba ke xover danê, destkewteyanê Kurdîstanî pawenê û serkêşîya têkoşînê azadîye kenê hedefê hêrişan de yê.

PDK rîyê menfeatanê xo yê semedê îqtîdar, keye û eşîrî ra her hetî ra rayîrê hêzanê îşxalkeran akeno. Hem rayîrê îşxalkerdişê Başûrê Kurdîstanî ramojneno dewleta tirke hem zî heme îmkan û zengînîya Kurdîstanî pêşkeşê ci keno. Dewleta tirke ya faşîsta ke estbîyayîşê xo serê îmhakerdişê kurdan de nayo ro hemkarîya ci ya bi PDKyî hinî hetê her kesî ra eşkera yena zanayene. Eke PDKyî paştî medayênê ci dewleta tirke nêeşkayêne wina hêrişê îşxalî yê pîlî vera Başûrê Kurdîstanî bikero.  Xayînîya PDKyî heta kurdan ra nîna qebulkerdene.  Şar vera îşxalî vejîyeno la ganî ewro ra tepîya nêrazîbîyayîşî bêrê xurtkerdene.

Xora wextê roşanê Çarşema Serê Nîsanê de hêrişê vera gerîlayan û pîya bi nê hêrişan hêrişê artêşa Iraqî yê vera Şingalî tesaduf nîyê. Dewleta tirke û PDK kenê ke fermanê Şingalî yê çeteyanê DAÎŞî biresnê sere. Dewleta Iraqî û PDKyî 2014 de komelê êzidîyan nêpawit û fermanî rê rî bi rî verda. Komelê êzidîyano ke pê hêzê xo xo paweno rojanê tewr bimbarekan de raştê hêrişê dewleta tirke, PDK û artêşa Iraqî yeno.  Dewlet û dezgehê ke qirkerdişê 2014î sey qirkerdişî qebul kerd eke samîmî yê ganî nê prosesî de zelal tewirê xo ramojnê.

Ma sey têgêrayîşê azadîye û şarî prosesêkê zorî yê têkoşînî de yê.  Serê destkewteyanê têkoşînê ma de hesabê leyminî yenê kerdene. Eke verê nê plan û hesaban nêro girewtene ma sey şarê kurdî raştê tehlukeyanê pîlan yenê. Ganî vera nê hêrişan û şerê qirkerdişî her wextî ra zafêr cepheyê têkoşîn û xoverdyaîşî bêro xurtkerdene. Nê hêrişê hemwext û zafhetinî çîyê normal nîyê. Coka vera nînan têkoşîn û xoverdayîş zî ganş  her wextî ra xurtêr bê. Gerîlayê azadîye yê Kurdîstanî ewro pê ruhê Apoyî ercanê ma û herra Kurdîstanî îşxalî ra pawenê.

Pawitişê welatî wezîfeyê heme kurdan o. Na çarçewe de ganî her kes  tewrê têkoşînî bibo. Pê têkoşînê rêxistinkerdeyî verê faşîzmî eşkeno bêro girewtene. Ganî Vakur, Başûr, Rojawan û Rojlihatê Kurdîstanî, Şingal, Mexmûr her cayo ke kurdî tede ciwîyenê bi ruhê seferberîye bibê warê xoverdayîşî. Sere de cinî û ciwanî ganî şarê ma û dostê ci wayîrê xoverdayîşê gerîlayan vejîyê û şerê şarî yê şoroşgêrî bêro xurtkerdene. Ganî bi ruhê Kobanê vera îşxalî sere bêro wedaritene û faşîzîm bêro rijnayene.''