Hemserekîya Konseya Rayberdişî ya KCKyî derheqê hêrişanê dewleta tirke ya îşxalkere yê serê Herêmanê Pawitişî yê Medya de eşkerayîyêke daye.

Eşkerayîye wina ya:

''Key selahîyetdarê PDKyî şinê Tirkîya, dewleta tirke vera Têgêrayîşê Azadîye yê kurdan dest pê hêrişî kena. Coak tesaduf nîyo ke pêvînayîşê dewleta tirke, Şêwirmendê MÎTî û Mesrûr Barzanîyî ra dima hêrişê vera Herêmanê Pawitişî yê Medya dest pêkerd. Îtîfaqê AKP-MHPyî wazeno pê paştdayîşê PDKyî têkoşînê azadîye yê şarê kurdî tasfîye bikero.

Şarê kurdî wazeno PDK hemkarîya dewlete ra fek vera bido. La PDK goş nêdano şarê kurdî, waştişê dewleta tirke ano ca. No zî şarê kurdî aciz keno. Bê temînatê PDKyî dewleta tirke nêeşkena Bamernî, Amediyê, Dêrelok û Şêladizê de hêrişê gerîlayan bikera. Hetê bînî ra tay cayan de PDK zî vera gerîlayan kewto mîyanê têgêrayîşan. Ê xîret kenê ke waranê gêrîlayan bigêrê binê ablûqa, têkilîya mabênê gerîlayan û şarî bibirnê. Na şirîkîya PDK û dewleta tirke zerar dana şarê kurdî.

Nê hêrişî têna vera gerîlayan nîyê û nê hêrişî kenê ke îradeyê şarê ma bêro şiknayene, polîtîkaya qirkerdişî pîl biba û destkewteyê Başûrê Kurdîstanî çin bibê. No çi do xo reyde netîceyanê giranan bîyaro. Armancê dewleta tirke o yo ke waranê stratejîkan ê cografyaya Kurdîstanî bivisna destî.

Sere de şarê Başûrê Kurdîstanî û hêzê sîyasî, ganî temamîya şarê Kurdîstanî, dezgehê demokratîk û hêzê sîyasî vera hêrişanê dewleta tirke wirzê payan ser. Şarê ma yê Başûrî 2008 de Zap, Bamernî, Kadîşe, Amediyê, Dêrelok û Şêladizê de weriştbi payan ser û rayîr nêdabi îşxalê dewleta tirke. Ewro zî ganî şarê Başûrî wezîfeyanê xo bîyaro ca.

Senî ke 40 serrî yo gerîlayî têkoşîn kenê 2021 de do şerêkê pîlî vera hêrişanê artêşa tirke bikerê. Ganî hêrişê dewleta tirke bêrê şiknayene. Seba ney zî ganî pêro parçeyanê Kurdîstanî de şarê ma, tewirêkê winasênî bimojno ke xoverdayîşê gerîlayan de bibo yew. Ganî ma her cade vera dewleta tirke têkoşîn bikerê, şorê serê dişmenê kolonyalîstî. Eke dewleta tirke her ca de şer kena, ganî ma zî her ca de şer bikera.

Dewleta tirke seba nê hêrişan Ewropa û amerîka ra destûr gêna. Ê Ukrayna de vera hêrişan wurzenê payan ser la vera hêrişanê dewleta tirke bêveng ê. Ganî ê biwazê ke dewleta tirke xo herêmanê îşxalkerdeyan ra apey bianca. Îtîfaqê AKP-MHPyî xîret keno ke pê mabênçîtîya Ukrayna û Rûsya rîyê xo yê raştikênî binimno. Hêzê Amerîka û Ewropa ancax peyê menfaatanê xo de yê. Ganî şarê Ewropa, hêzê demokratîkî, şarê Amerîka û hêzê ci yê demokratîkî na raştîye bivînê û vera têkilîyanê gemarinan ê bi dewleta tirke wurzê payan ser.

Dewleta Iraqî zî nê hêrişan ra mesuldar a. Ganî Iraq vera îşxalê Başûrî têbigêro. Wina aseno ke PDK û Iraqî erdêko hîra roto Tirkîya. Ganî şarê Iraq û Başûrî hesabê ney bipersê.

Hukmatê AKP-MHPyî plansazîya hêriş û îşxalî ya hîra kerda. Ê hedef kenê ke destkewteyanê kurdan çin bikerê û weçînayîşan de reyna bibê îqtîdar. Bi nê hawayî goreyê hesabê înan ê do kurdan qir bikerê û biresê armancê xo. Ganî şarê kurdî û dostê kurdan her ca de wurzê payan ser û têkoşînî geş bikerê. Ganî no têkoşîn Kurdîstan de nêmanp her ca de bêro kerdene.

Bi têkoşînê hempar û yewbîyayeyî yê şar û gerîlayan nê hêrişî bêrê çinkerdene. Berê Kurdîstanê Azadî û Rojhelatê Mîyanênî yê Demokratîkî heta peynî abibê.''