Koordînasyonê Komalên Jinên Kurdistan (KJK) derheqê hêrişê dewleta tirke yê vera Silêmanî de ke di rojanmegerî şehîd bîyî, eşkerayîye daye û nê vatî:

''Ewro saetanê serê sibayî de kedkarê Çepemenîya Cinîya Azade Gulîstane Tara û Hêro Bahadîn hêrişê droneyanê çekdaran ê dewleta tirke de şehîd bîyî. Ma sere de nê hêrişê elçaxî şermezerar kenê kedkaranê çapemenîya azade, keyeyanê înan rê şarê xo rê sereweşîye wazenê.  Ma soz danê ke ma do Gulîstane Tara û Hêro Bahadîn têkoşînê xo yê cinîyan azade de sey cinîyan ê qehremanan ê dinya azade bidê ciwîyayene. Rêbîno ke hêriş de birîndar bi ma ci rê şîfa wazenê.

Seba ke vera hêrişanê dewleta tirke yê serê Başûrê Kurdîstanî çîyo ke hewce keno nêame kerdene nê hêrişî bi hayekê sîstematîkî dewam kenê.Tîmanê Ronayîşê Haştîya Komelkî (CPT) eşkera kerdbi ke mabênê serranê 1991-2024î de hêrişanê dewleta tirke de 344 kesan dinyaya xo bedilnaye, 358 kesî birîndar bîyî û netîceya nê hêrişan de 170î ra zafêr dewî ameyî vengkerdene. Reyna Rojawan û Şingal de hêzê îdareyê xoserî û sîvîlî yenê qetilkerdene. Vakurê Kurdîstanî de vera ziwanê kurdkî şer yeno rayraberdene. Konseptê qirkerdişê kurdan o topyekun yeno caardene.

Tarîxê 15.08.2024î de bi pêkerdişê Anqara-Bexdad-Hewlêrî pêkerdişo newe yê qirkerdişê kurdan kewt dewre.  No pêkerdiş de goreyê pêkerdişanê bînan çîyêk est o. Reya verên a ke partîya ke xo sey partîya kurdan hesibnena tede ca gena. PDKyî badê nê pêkerdişî rolê karanê teberî yê Tirkîya girewt xo ser û waşt wa hêzê xopawitişî yê Şingalî YBŞ-YJŞ bêrê tesfîyekerdene û çapemenîya azade bêro qefilnayene. PDKyî bi nê tewirî warê hêriş û qirkerdişanê neweyan afirna. Gulîstane Tara û Hêro Bahadîn netîceya nê pêkerdişî de ameyî qetilkerdene.

Wa şarê ma û rayapêroyîya erjîyayîye bizano ke, no pêkerdişo newe yê qrikerdişî bi qetî têna vera Têgêrayîşê Azadîye nîyo. Planêko newe dewre de yo. Bi nê planî yeno waştene ke sere de federasyonê Başûrê Kurdîstanî hêdî hêdî werte ra bêro wedaritene, vera Rojawan û Şingalî hêrişî bêrê kerdene û her hetê dinya de kurdî bêrê hedefgirewtene. Pêkerdişêko newe yê Cezayîrî û rewşêka newî ya Enfalî rojdemê înan de yê û seba ke Têgêrayîşê Azadîye verê nê de asteng o, ey hedef genê. Vera gerîlayan bi hemkarîya dewleta tirke-PDKyî operasyonê îşxalî ke yeno rayraberdene waştişê ci projeyê Mîllî Mîsakî yo ke Musul-Kerkûkî zî hedef geno.

Na çarçewe de ma veng danê heme şarê xo û rayaperoyîye ke wa vera îxanet û qirkerdişî tewiro şorişgêr bîgêro. Ma veng danê reyapêroyîya mîyanneteweyîye serbestîya warê teyarayan ke dewleta tirke tira Başûrê Kurdîstanî, Şingal û Rojawanî dana bombayan ver hemkarîya qirkerdişê kurdan a. Ganî na hemkarîya qirkerdişî bêro caverdayene. Ma veng danê her kesî ke wa şiro komelê mîyanneteweyî ser ke gamêke bêro eştene.  Wa çew şarê kurdî ser ra sîyaseto erjan mekero û hêzê kurdan nêvînayîş ra mero. Şarê kurdî do her wextî ra xurtêr nê pêkerdişê qirkerdişî bikero parçe, dîktatorîye do birijîyê  û bêrê muhakemekerdene.''