Komelanê Cinîyan ê Kurdîstanî (KJK) pare kerd ke prosesê pandemîye de ganî têkoşînê cinîyan her cayê dinya de xurt bibo û venga cinîyan da ke paştî bidê yewbînan.

Eşkerayîya KJKyî wina ya:

''Ma benê şahîdê ci ke her cayê dinya de pê armancê bêhêzkerdişê cinîyan hêrişê qirkerdişî yenê kerdene. Zêdebîyayîşê şîdetê vera cinîyan pabesteyê krîzê sîstemê kapîtalîstî yê camêrdan o. Ma sey Têgêrayîşê Azadîye yê Cinîyan ê Kurdîstanî yo ke pê mîrasê têkoşînê cinîyan ê unîversalî xo rêxistin keno, xo sey parçeyêkê  têgêrayîşê cinîyan ê dinya vînenê û xo teberê Kurdîstanî de zî mesuldar qebulkenê. Xelisîyayîşê cinîyan do bieşko her mesele çareser bikero.Dişmenî û şerê vera cinîyan ewro pêro dinya de asta tewr berze de ya. Pandemîya raştikêne ya pîle şîdetê camêrdan û dişmenîya cinîyan a. Ganî têkoşîn û rêxistinbîyayîşê ma hetêkî ra cinîyan bihêz bikerê û hetêkê bînî ra zî hîşmendîya qelse bêtesîr bikerê.

Têkoşîn û rêxistinbîyayîşê cinîyan pê prosesê pandemîye yenê astengkerdene. Ganî ma sey cinîyanê dinya vera naye stratejîya xoverdayîşî awan bikerê. Şertê sey prosesê pandemîye vurîyenê la hîşmendîya serdestîya camêrdan mende ya. Coka ganî ma hol bivînê ke no proses senî seba qirkerdişê cinîyan yeno xebitnayene. Hêrişê vera Têkoşînê Azadîye yê Cinîyan ê Kurdîstanî mîsalê nê çîyan ê.

Kobanê de hîrê cinîyî ameyî qetilkerdene

Hêrişêkê vera cinîyan ê rayberanê şorişî Kobanê de qewimîya. Kobanê de hîrê cinîyê endamê Kongreya Starî ya ke binê sîwana  Têkoşînê Azadîye yê Cinîyan ê Kurdîstanî de ca gêna, hetê artêşa tirke ra ameyî hedefkerdene. Nê hêrişê pê teyaraya keşfî de hîrê cinîyî zî ameyî qetilkerdene. Dewleta tirke ya ke Efrîn, Girê Sipî û Serêkanîyê ra dima wazena Kobanê zî îşxal bikera, pê zanayîşî cinîyanê Kobanê hedef kena. Çunke Kobanê xoverdayîşê cinîyan temsîl kena. Warê hewayî yê Kobanê binê pawitişê Rûsya de yo. Naye ra yeno famkerdene ke hêzanê mîyanneteweyîyan seba nê hêrişî destûr dayo dewleta tirke.

Îşxalê Efrînî

Şaristanê Efrînî yê Rojawanî zî sembolê Şorişê Cinîyan ê Rojawanî yo ke nika hetê dewleta tirke ra ame îşxalkerdene. Nê şaristan û dormeyê ci de pakîya etnîke yena kerdene, tede ziwanê kurdkî ame qedexekerdene û şerîat yeno caardene. Beşêko pîl ê şarê Efrînî neçare bi ke koç bikero, êyê ke mendî vera rejîmê terorî têkoşîn kenê. Seba ke sembolê Şorişê Cinîyan o Efrîn de vera cinîyan zaf teda, şîdet û qirkerdiş yenê kerdene. Cinîyî yenê remnayene, roşîyenê, yenê qetilkerdene, esîrkerdene. Bêvengîya NATO û Neteweyan ê Yewbîyayeyan hemkarîya înan û rîyê înan ê raştikenî mojnena. 

Tirkîya de şîdetê vera cinîyan yeno teşwîqkerdene

Hêrişê qirkerdişî yê vera cinîyan Tirkîya de pê pêro metodan yeno kerdene. Dewleta tirke prosesê pandemîye de şaredarîyê kurdan ê ke pê sîstemê hemserekîye yenê îdarekerdene, îşxal kerdî. Nê prosesî de sûcdarê tecawuzî, îstîsmarê cînsîyî ameyî veradayene. La cinîyê sey aktîvîst, sîyasetmedar, şaredar û heta mayanê haştîye zîndan de yê. Vakurê Kurdîstan û Tirkîya de wextanê peyênan de kişîyayîş û xokiştişê cinîyan ê şikdarî zêdîyayî.

Bi heman hawayî Başûr û Rojhelatê Kurdîstanî de zî şîdetê vera cinîyan zaf zêdîya. Hêrişê hewayî yê dewleta tirke bi taybetî tesîrê cinîyan kenê. Tewr peyên 14ê hezîrane de herême daye bombayan ver.

Ma eşkenê şorişê cinîyan awan bikerê

Ma sey cinîyan eşkenê şorişê xo awan bikerê. Sîstem wazeno ma têna biverdo û îzole bikero. Coka ganî cinîyî pîya şorê, têna nêmanê, wayîrê yewbînan bivejîyê. Na gama yewine ya.

Gama diyîne; ganî ma huqûqî ra heta keye her war de xo rêxistin bikerê. Bi hawayêkê kolektîfî sîstemê serdestîya camêrdan qels bikerê.

Gama hîrêyîn; ganî ma têkoşînê sîstemê serdestîya camêrdan de hîşmendîya pederşahî hedef bikerê. Çunke na hîşmendîye sebebê şîdetî ya. Ganî ma hîşmendîye îfşa, teşhîr û tecrîd bikerê.

Ganî ma waranê xo yê azadîye bikerê hîra

Gama çarine; ganî ma sey kom, rêxistin û têgêrayîşê cinîyan bingeyê hîşmendîya azadîye de sîstemê xo awan bikerê.Awankerdişê sîstemê xoserî yê demokratîkî yê cinîyan do bêra manaya cuya azadîye. Seba tengkerdişê waranê tesîrê sîstemê serdestî ganî ma waranê azadîye yê xo hîra bikerê. 

Nika wext wextê ney o! Ma pîya vera her tewirê şîdetê serê cinîyan wurzê! Zincîra ke ma pîya awan bikerê, bivurnê dêsêkê vera pederşahî, nîjadperestî û kolonyalîzmî! Ma sîstemê xoserîya demokratîke ya cinîyanê dinya awan bikerê.

Ma eşkenê naye bikerê!

Wextê ci yo ke ma her cayê dinya de Şorişê Cinîyan ê pîl û tarîxî awan bikerê, Kurdîstanî ra heta Minneapolis, Ciudad Juarezî ra heta Kandar, Xartumî ra heta Madrîdî sîstemê serdestîya camêrdan birijnê!''