Koordînayonê KJKyî bi eşkerayîyêke semedê girdkerdişê têkoşînî veng da û nê parî kerdî:

''Faşîzmê AKP-MHPyî hêrişanê şarê taybetî yê topyekunî keno zêdêr. Îqtîdaro ke vîrusê Korona xo rê sey firsend dî, vera kurdan şerê qirkerdişî keno. Nê hêrişî resayî a asta ke karmendanê xo yê talankeran, dizdan, tecawuzkeran û kolonyalîstan şaredarîyan de ca keno. Tewr peyêne zî  şaredarîyan de karmendê xo ca kerdî. Oyo ke 15ê gulane de vera 5 şaredarîyan ame kerdene, qirkerdiş, zulm û darbekerî yo. 

Îqtîdarî pê na darbe reyna nêzdîbîyayîşê xo yê vera kurdan mojna. AKP şer de israr keno û wazeno ke verê çimanê pêro dinya de nê şerî meşrû bikero. Îqtîdar pê nê hêrişan  vano ke wa kurdî vengê xo nêvejê. No faşîzm o. Ganî merdimê rûmetênî vera ney bêveng nêmanê. Ganî şarê ma vajo ke 'ma kolonyalîstan, dizan, talankeran, tecawuzkeran şaristan û qezaya xo de nêwazenê.' Ganî tewirêkê xurtî bimojno.

Wext wextê xoverdatîşê vera qirkerdişî yo, wextê pawitişê destkewteyan o. Nê prosesê Korona de ganî her keye, kuçe, sîte, şûmşîn bibê meydanê çalakîye. Ganî ma vengê xo berz bikerê û têkoşîn xurt bikerê. Dewleta tirke pê huqûqê dişmenîye wazena kurdan qir bikera û kerdişanê xo yê faşîstan dewam bikera. Pêro dinya vera vîrusê Korona têkoşîn kena la îqtîdaro gemarin ê AKP-MHPyî vera kurdan şer keno. Şarê kurdî û cinîyê kurdî Erdogan tersnenê. Xêrê tewir û xoverdayîşê dadîyan ra şarê m do nê şerî de ser bikero.

Her keso ke seba afernayîşê Tirkîyayêka demokratîke têkoşîn kenê ganî pê xurtkerdişê paştdayîşî û rêxistinîye cewab bidê nê kerdişanê huqûqê dişmenîye. Ma venga hêzanê demokrasîyî danê ke vera faşîzmî tewirêkê xurtêrî bimojnê, wayîrê îradeyê weçînayîşanê şarî bivejîyê û dewlete ra hesab bipersê. Ganî bêro vatene ke wext wextê xurtkerdişê paştdayîşê pê şarê kurdî yo û vengê xo bikerê yew, hêvî pîl bikerê û ameyoxê azadî awan bikerê!

Vera îqtîdarê faşîstî yê AKP-MHPyî ma her ca de paştî bidê yewbînan. Ma vanê ke hêzê sosyalîstî û antîkapîtalîstî, cinîyî, feminîstî, ekolojîstî ganî ewro vera qirkerdişan wurzê payan ser, seba awankerdişê Tirkîyayêka demokratîke û azade her kes têkoşîn pîl bikero.''