Koordînasyonê KJKyî bi wesîleya 8ê Adare Roja Cinîyan ê Kedkaran a Dinya bi mesajêk ercnayîyêşêko hîra kerd 

Mesajê KJKyî wina yo: 

''Sîstemê serdestîya camêrdan xîret keno ke seserra 21. zî bikera seserra tarîtîya xo. La cinîyî her cayê dinya de vera naye vejîyenê, sere wedarenê. Cinîyî hînî statuyê koledarîye qebul nêkenê. Cinîyî pê nê ruhî 8ê Adare pêşwazî kenê. 

Serra 2020î seba cinîyan ê kurdan bîye serra xoverdayîşî. Sere de Heftanîn de pêro waranê gerîlayan û komelî de xoverdayîş aver şi. Nê xoverdayîşî de embazê ma yê ercîyayeyî yê sey Zîne, Esmere, Nûcane, Aryana Baran, Leyla Agirî, Amara Batman, Sema Koçer şehîd bîyî. Ma bara şehîdan girewte xo ser û soz danê ke ma do şorişê cinîyan bîyarê ca.

Rayber Apoyî rayberîya azadîya cinîyan zî kerda

Rayberîya ma 23 serrî yo zîndanê Îmraliyî de mîyanê xoverdayîşî de yo. Bi wesîleya 8ê Adare ma reyna sey têgêrayîşê cinîyan ê kurdan pare kenê ke azadîya Rayberîya ma azadîya cinîyan a. Coka her xebat û nefesê ma seba azadîya ci ya. Ma do tecrîd bişiknê û Rayber Apo azad bikerê.

Semedo ke Rayberîye têkilî û cuya alternatîfe kesayetê xo de temsîl kerdî, maruzê tecrîdê tewr giranî yê tarîxê merdimîye beno. Rayberîya ma bi serran o pêvînayîşan ra mehrûm maneno, ci rê şîdeto psîkolojîk yeno kerdene. Nê kerdişê kerdişê zulmkerî yê sîstemê serdestîya camêrdan o. Hesabê nê kerdişan do bêro persayene.

Bi wesîleya 8ê Adare ma rayberê têkoşînê xo yê azadîye Rayber Apoyî bi hûrmet, heskerdiş û rêzdarî selam kenê. Ewro pêro dinya seba wedaritişê tecrîdî payan ser o ya. Azadîya kurdan verî wina qet nêbibî rojdemê dinya. Kurdî û cinîyî hînî teyna nîyê. Heta ke ma pê hêzanê xo yê esasan têkoşîn bikerê hêzê demokrat û azadîwaştoxî do hetê ma de bibê.

Nê prosesî de zêdêr şarê ma, dadîyî, cinîyê ciwanî xo ver danê. Ma Roşanê 8ê Adare yê înan pê heskerdiş, coşî fîraz kenê.

Xoverdayîşê Garê yê gerîlayanê HPG-YJA-Starî tarîxî yê

Tewr peyên xoverdayîşê Garê de fermandarîya Şoreş Beytuşşebabî de 15 embazê ma şehîd bîyî. Ma înan pê rêzdarî û minetî yad kenê. Xoverdayîşê Garê têkoşînê ma de rîpelêko newe akerd. Dewleta tirke vera gerîlayan de bin kewte. Netîceya naye do peynîya îqtîdarê AKP-MHPyî bîyara. Xoverayîşê gerîlayan û xoverdayîşê cinîyan yewbînan ra hêz gênê û pîl benê. Ma bi weîleya 8ê Adare reyna serkewtişê Garê fîraz kenê. 8ê Adare yê pêro gerîlayan û ê birîndar û gazîyan wa fîraz bo. 

Zîndanan de bi hezaran embazê ma seba azadîya Rayberîya ma grevê vêşanîye de yê. No xoverdayîşê zîndanan adirê têkoşînê cinîyan zî geş keno. Ma 8ê Adare yê nê embazanê xo zî fîraz kenê.

Hêrişê dewleta tirke û modernîteya kapîtalîste yê vera cinîyan ê kurdan îdeolojîk ê. Tewr peyên Leyla Guven û Vervatoxa TJA Ayşe Guven ameyî tepiştenê û înan rê persê 'Şima çira sîstemê kokê dadîye pawenê' persîya. Ê xo sey vervatoxê sîstemê kokê camêrdî vînenê û wazenê ma ceza bikerê. Dewleta tirke wazena Peymana Îstanbulî ra vejîya. Ma hetê têkoşînê caardişê na peymane de yê. 

Têkoşînê vera qeyûman

Têkoşînê ma yê vera qeyûman esasî yo. Ma heqê xoîdarekerdişî têna seba cinîyan û şarê xo nê seba her kesî pawenê. Coka ma hetê têkoşînê wendekaranê Bogaziçi de yê. Ma xoverdayîşê înan selam kenê. Têkoşînê dezgehan ê vera şîdetê serê cinîyan û rêxistinîya înan zî zaf girîng û ercîyaye yê. Ma nê pêro têkoşînan selam kenê.

Ma do hem rojdemanê şîdetê vera cinîyan, kurtaj ûsn heqê xo bigêrê hem zî seke Şorişê Rojawanî de dîya her ca de têkoşînê cûya têdûşte bidê. Ma do bi hawayêkê stratejîkî tewrê her warê cuye bibê û camêrdan bivurnê. Ma do pê taktîkanê hîrayan vera entegreyê serdestîra camêrdan vejîyê. 

Ma asta girînge de yê

Kurdîstan de temamîya tarîxî de yewî û paştdayîşê cinîyan hende aver nêşibî. Prosesê neweyî de na rewşe do pê xoverdayîşî zêdêr aver şora. 

Cinîyî do hînî statukoyê koledarî qebul nêkerê coka qerardar ê ke têkoşînê bêamanî bîyarê ca. No têkoşîn keye, war, dew, koy û gelîyan de her roje beno pîlêr. Xoverdayîş, serewedaritiş, protestoyî kodanê cînsîya komelkî şiknenê, kenê parçe. Ma seba şiknayîşê serdestîya camêrdan dinya û Kurdîstan de asta krîtîke de yê.Ma venga cinîyan danê ke 8ê Adara 2021î de nê sîstemî birijnê.

Cinîyê kurdî rayberîya têkoşînê azadîye ya cinîyanê dinya kenê

Rêxistinîya cinîyan ê kurdan a vera sîstemê camêrdan bala dinya ancena. Seke zanîyeno dewleta tirke û sîstemê ci yê camerdîye 2020 de bi taybetî cinîyê kurdî kerdî hedef.  Qey3umî verî dezgehê cinîyan qefilnayî, cinîyê sîyasetmedarî erzîyayî zîndanan, çawişanê pisporan ê dewlete Kurdîstan de cinîyan rê tecawuz kerd, polîtîkayê ajankerdiş, fuhuşî zêdîyayî, Efrîn de cinîyî ameyî qetilkerdene. Dewleta tirke pê mantiqê faşîzî vera cinîyan ê kurdan dişmenîye kena. Dewleta tirke pê tecawuzê cinîyan ê kurdan sey obje vînena. 

Dewleta tirke krîzê tewr giranî de ya. Îqtîdarê faşîstî AKP-MHPyî peynî de dezgehan û zanîngehan de zî polîtîkaya qeyûmî dewlete viste destî. Îqtîdarî Kurdîstan û Tirkîya de faşîzm vila keno, wazeno hêzanê çepgîran taswîye bikero. La seke xoverdayîşê Bogaziçi de dîya AKP her roje beno qelsêr.

Şorişê Cinîyan ê Rojawanî

Kurdîstan û Tirkîya de cinîyê kurdî rayberîya xoverdayîşî kenê. Tepişîyayîşê kadroyan ê cinîyan, hedefkerdişê nê kadroyan nîşaneya tersê îqtîdarî ya. Xeta ma ya azadîye, felsefeya ma kokê cinîyan û komelî de xo na ro. Nê kokî gandar ê. Eqsê ci ewro têgêrayîşê cinîyan vil danê. Pêro pratîkê dinya têgêrayîşê cinîyan ê kurdan qebul kena.Bi şorişê Rojawanî cinîyê kurdî zêdêr şinasîyenê. 

Rojawan de sîstemê hemserekîye hetê cinîyan ra zêdêr qebul bîye, xopawitiş sey esas ame girewtene. Îtîfaqê kurd-ereban zî tewr zêde serê cinîyan ra yeno caardene. Cinîyê erebî her ke îdeolojîya Rayberîye ma şinasnenê biikelecan benê. Qirkerdişê Seda Feysel El Hermes û Hinde Letîf El Xidar coka ame caardene. No qirkerdiş zî karê AKP-MHPyî bi. Ê yewîya cinîyan ê ereban û kurdan ra tersenê. La cinîyê erebî têkoşînê ma yê azadîye ra hêz gênê. Rojawan de yewîya neteweyî ya demokratîke hetê cepheyê cinîyan ra ameye caardene.

Îran kerdişanê tewr barbaran ferz keno

Îran vera cinîyan û şaran hêrişanê giranan keno. Îran de cinîyî maruzê teda, îşkence, tepiştiş, dardekerdişî benê. Kerdişê Îranî û kerdişê dewleta tirke seyci yê. Cinîyê sey Zeynepe Celalîyan, aktîvîstê cinîyî, temsîlkarê heqanê merdiman, mamostayî, hunermendê cinîyî bi neheqîye tepişîyenê û erzîyenê zîndanan.

Rejîmê Îranî Rojhelatê Kurdîstanî de zî vera kolberan qirkerişan keno. Reyna rejîmê Îranî vera kurdan polîtîkaya fuhuş û ajankerdişî ano ca. Îran de zewajê domanan yeno normalîzekerdene, xokiştişê cinîyan zêdîyeno. Rejîm keno ke cinîyan teslîm bigêro. Cinîyê Îranî vera nê kerdişan xo ver danê.

Başûr de waştişê azadîye yê cinîyan

Başûrê Kurdîstanî de merkezê ci Silêmanî seba azadîye waştişêko pîl esto. Cinîyê Başûrî bi fedakarî, çêrî tewrê şorişî bîyî. Rixmo ke Başûr de destkewteyê şarê ma girîng ê tîya de xebatê azadîye yê cinîyan zaf nêvejîyê werte. Semedê ney zî hîşmendîya seksîst a. PDK verê xeta cinîyan gêno.

Başûr de zewijnayîşê domanan, şîdetê vera cinîyan, xokiştişî, xovêşnayîşî dewam kenê. La reyna zî cinîyan de hîşmendîyêka cidî virazîyaye û na hîşmendîye sîstemî  qebul nêkena û vera ci sere wedarena.

Şingal de averşîyayîşê şorişê cinîyan

Şingal de zî ma eşkenê vajê ke seba şorişê cinîyan averşîyayîşê pîlî estê. Wexto ke qirkerdişê DAÎŞî ra dima cinîyanê Şingalî fikrê Rayber Apoyî şinasnayî zaf aver şîyî. Cinîyê êzidîyî zaf lez aver şîyî û tewrê xebatanê komelkîyan ê şorişî bîyî.

Çalakîyî wa goreyê perspektîfê neteweya demokratîke bibê

Hemleyê ma 'Tecrîd, faşîzm û îşxalî rê bes o, wext wextê azadîye yo' û 'vera qirkerdişê cinîyan wext wextê pawitişê cinîya azade û komelî yo' hetê tarîxê têkoşînê ma ra girîng ê.

Ganî çalakîyê 8ê Adare goreyê pespektîfê neteweya demokratîke bêrê kerdene û hemleya 'Wextê Azadîye yo' reyde bibê yew. 

Îqtîdarê AKP-MHPyî do birijo

Ma nê esasî ser o 8ê Adare bi ruhê xoverdayîş û azadîye fîraz kenê. Ma Sakîne Cansiz ra heta Berîtane, Zîlane, Sema, Şîlan Kobanê, Arîne Mîrkan, Leyla Agirî û Zîne Cizîr pêro şehîdan bi rêzdarî yad kenê. Ma soz danê ke Kurdîstan de şorişê cinîyan bîyarê ca. Ma do sey cinîyan ê kurdan dinya de rayberîya şorişan bikerê. Yewîya cinîyanê Rojhelatê Mîyanênî do Kurdîstan 3u bi xo demokratîk bikerê. Cinîyê kurd, ereb, çerkez, kurd, elewî, yarsanî seba averberdişê cuya alternatîfe rayberîye bikerê. AKP-MHPyo faşîst do pê xoverdayîşê cinîyan birijo.

Ma do 2021 de pê konfederalîzmê cinîyan ê demokratîkan têkoşînê xo bi qerardarî bîyarê ca

Nê esasî ser o ma venga cinîyanê Kurdîstan, Rojhelatê Mîyanênî û dinya danê ke bi hawayêkê coşî tewrê çalakîyanê 8ê Adare, grevê cinîyan bibê û asta têkoşînî berz bikerê. Êyê ke do ser bikewê cinî yê. Pêro beşê sîstemê serdestîya camêrdan do bêrê rijnayene. Fikrê azadîye yê Rayberîya ma, merdimîye do ser bikewê.''