Komelanê Cinîyanê Kurdîstanî (KJK) pê eşkerayîyêke pare kerd ke pandemîya Covid-19î ya ke menga kanûne de vejîyaye werte netîceya modernîteya kapîtalîste ya.

Eşkerayîya KJKyî wina ya:

''Sîstemê kapîtalîstî kanser vila kerd. Dewleta tirke vîrusê Korona xo rê sey firsend dî û îhaleyê Kanal Îstanbul nê wextî de kerd ke no proje rijîyayîşê ekolojî, çinkerdişê çimeyanê awe û daristanan o. Ma pêro raywanê heman keştîye yê. Ma pêro heman aste de berpirsîyarê nê krîzî nîyê. Berpirsîyarê verênî  kapîtalê fînansî yê global û newete-dewlete yê. Reyna ame dîyene ke dewlete komelî ra nê, kapîtalîzmê globalî rê fayde kena. Pê sloganê 'keye de bimane' reyna cinîyan ra ame waştene ke 'fedakarîye' bikerê û tay berpirsîyaranê sey miqatbîyayîşê domanan, karê keyeyî bîyarê ca ke dewlete eştî înan ser. Tesaduf nîyo ke şîdetê vera cinîyan nê prosesî de zêdîyeno. 

Vîrusê Korona çekêka bîyolojîk a. Pê na çeke xîret kenê ke ma qebul bikerê ke estbîyayîşê têna cuya bîyolojîk a. Gelo ma do bieşkê ke rewşêka winasêne de qala estbîyayîşî bikerê. Xora bi seyan serrî yo ke dewletê hegemonî û hêzê herême vera kurdan caardişanê sey qirkerdişî kenê. Bi nê hawayî vanê ke: 'Eke şima wazenê weş bimanê nasname, têkoşîn, komelbîyayîşî ra fek vera bidê.' La ma estbîyayîşê co ra fek vera nêdanê! Ma cuyêka azade, biîrade û birenge de isrardar ê!

Ganî hem bi hawayêkê şexsîyî hem zî asta kolektîfe de cuyêka ekolojîke bêra awankerdene û xoza bêra pawitene. Seba ney zî ganî ma hêzê pawitişê xoza û cuye awan bikerê. Ma sey cinîyan ganî rayberîya naye bikerê. Çunke tesîrê ney tewr zaf tesîrê ma do bikero. O çax ma do xo, estbîyayîşê xo, erjanê xo yê komelkîyan, xozaya xo, planetê xo, cuya xo her ca de bipawê!

-Ma dp weşîya şarî bi taybetî yê cinîyan dewlete rê nêverdê û teslîmê endustrî û polîtîkaya taybetkerdişî ya neolîberalîzmî nêkerê. Ma do komun û merkezê weşîye yê şarî û cinîyan awan bikerê!

-Ma do estbîyayîşê xo yê sîyasî bêtesîr nêkerê, nêkerê binê goran! Ma do pê afernayîşê têkoşînê xo yê komelkî dewam bikerê, xo rêxistin bikerê, xo ver bidê!

-Ma do nêverdê ke teppişteyê sîyasîyî mîyanê lapanê mergî de vera bidîyenê û seba azadîya înan têkoşîn bikerê!

-Xoza yê ma nîya, ma ê xoza yê! Ma nêverdê ke xoza hînî talan biba. Seba naye zî ma do tabîata xo ekolojîk bikerê û vera cerganê talankeran ê kapîtalê fînansî wurzê payan ser!

-Ma do vera talan, îşxal û kolonyalîzmî xoverdayîşê hemparî bikerê!

-Ma vurnayîşêkê radîkalî yê sîstemî wazenê ke ked, berardiş û newe ra berardiş goreyê hewcedarîyanê komelî bibê!

Nika ra ma dest pê awankerdişê nê sîstemê azadîperwerê demokratîk-ekolojîk-cinîye kerd û ma sey cinîyan rayberîya ci kenê. Ma eşkenê ser bikewê! Çunke ma cinî yê û hêzê ma esto ke ma dinya bivurnê!''