Kobanê de wextanê peyênan de xokiştiş û kişîyayîşê cinîyan zêdîyayî. Nê rojanê peyênan de Kobanê de 2 cinîyan goreyê îdîayan xo kişt, 3 cinîyî kişîyayî, 3 cinîyî zî bi hawayêkê şikdarî merdî. 

Rêxistina Têkoşînê Vera Şîdetê Serê Cinîyan a Sara, Kongreya Starî reyde seba ke bale bianca xokiştiş û kişîyayîşê cinîyan ser 21ê tebaxe de hamleya 'Aye xo nêkişte, şima a kişte' daye destpêkerdene. Çarçewa hamle de derheqê serebûtanê cinîyan de medyaya komelkîye de hashtagî do bêrê akerdene, vilawekî bêrê vilakerdene, semîner û panelî do bêrê serûberkerdene.

Endama Rêxistine Zozane Xelîl derheqê babete de qisey kerd û vat: ''Ma seba ke bala komelî bianca serebûtanê cinîyan ser hamleyêka winasêne daye destpêkerdene. Çunke komelê ma wazeno ke sûcê winasênî eşkera nêbê, mîyan bibê.''

Zozane Xelîl da zanayene ke rîyê vîrusê Korona ra herême de qedexeyê tebervejîyayîşî esto û coka ê nika têna xebatê sey akerdişê hashtagî, vilaweke û dardekerdişê pankarte kenê. Zozane Xelîl ard ziwan ke ê do qedexeyî ra dima semîner û panelan zî serûber bikerê.