Wekîla HDPyî ya Mûşî Gulistane Kiliç Koçyîgît derheqê pêşnîyazê Budçeya Rayberdişîya MErkezî ya serra 2021î de ANFyî reyde qisey kerd û polîtîkayê îqtîdarî yê seba cinîyan rexne kerdî.

Gulistane pare kerd ke nîqaşê derheqê zanîngehanê cinîyan de fikrê cînsîyî yê AKPyî ra cîya nîyê. Gulistane Koçyîgît vat: ''Pêro îdare û wezaretî destê camêrdan de yê. Temsîlê AKPyî de nameyê cinîyan çin o. Par zî nê aqilî budçe ra barê cinîyan nêda. Ganî îqtîdarî seba cinîyanê ke prosesê pandemî bêkar mendî, budçeyêka xoser bikerdêne. Hêverî cinîyî karî ra yenê vetenê. Coka bêkarîya cinîyan asta tewr berze de ya. Ma heta nika raştê xîretêkê wezaretêkî nêame ke verê bêkarîya cinîyan gêno. Cinîyî bi hawayêkê pêroyî nêeşkenê sîstemî ra barê xo bigêrê. Ma sey Meclîsê Cinîyan ê HDPyî prosesê budçe teqîb kenê. Ma kêmasîya temsîlîye û budçeya seksîste bi doneyan rexne kenê. Labelê ganî bêro vatene ke aqlê AKPyî bi temamî aqlê camêrdan o û nêeşkeno na rewşe fam bikero.''

 Gulistane Kiliç Koçyîgît bale ante girîngîya xoxurtkerdişê cinîyan û vat: ''Ganî ma ci ser o vinderê ke babeta zanîngehê cinîyan berhemê kamyew aqilî yo. Xora wa zanîngehê cinîyan estbê, polîtîkayê cinîyan bêrê nîqaşkerdene, derheqê cinîyan de her çi wa bêro wendene. Labelê eke no çi perwerdeyê karma reyde sey ci bo hînî beno çîyêko cîya. AKPyî hema asta dibistana mîyanêne de hem zî asta lîseyî de sîstemê îmam hatîpî awan kerdp û bi nê hawayî derbazê perwerdeyê seksîstî bîyo. Nika AKP xîret keno ke no sîstem wa zanîngehan de zî ronişo. ''

 Gulistane Kiliç Koçyîgît seba 25ê Teşrîna Peyêne Roja Têkoşînê Vera Şîdetê Serê Cinîyan veng da û vat: ''Meclîsê Cinîyan ê HDPyî xîret keno ke vera şîdetî bi hawayêkê aktîfî têkoşîn bikero.Eke ewro seba cinîyan gamêka qije zî ameya eştene, eke cinîyî vera şîdetî wurzenê payan ser, eke polîtîkayê bêcezaveradayîşî bi hawayêkê bêperwa nênê caardene nê pêro sayê têkoşînê cinîyan de yê. Ma do têkoşînê xo yê seba cu, heq dewam bikerê. Ma çend zêde bibê hende eşkenê sîstemê camêrdan qels bikerê. Ma venga pêro cinîyan danê ke 25ê Teşrîna Peyêne de vejîyê meydanan û dormeyê azadîye de kom bibê.''