Kongreya Starî seba ke têdûşyîya cînsîyetî û rolê cinîyan mîyanê komelî de bêrê caardene Akademîya Komelê Demokratîkî ya Halepî de bernameyê perwerdeyî organîze kerd. 32 camêrdî beşdarê bernameyî bîyî.

Bernameyê perwerdeyî 5ê kanûne de ame akerdene û îdarekarê dezgehanê sivîlan, temsîlkarê partîyan, hemserekê komunanê taxanê Eşrefîye û Şêxmeqsûdî tewrê akerdişî bîyî.  Bername de derheqê babetanê komelê tabîyî, têdûştîya cînsîyetî, tarîxê cinîyan, azadîya cinîyan, jîneolojî, şexsê demokratîkî û sîstemê hemserekîye de dersî ameyî dayene.

Endamê Komîteya Perwerdeyî ya Kongreya Starî Rûşîn Silêmanî vat: "Neteweyo demokratîk bi perwerdekerdişê komelî dest pêkeno. Wextê ci ame ke bi bernameyanê perwerdeyî ma ferasetê komelî aver berê, zîhnîyetê pederşahîye wedarê, fikranê Rayber Abdullah Ocalanî bişinasnê, mabênê cinî û camêrdan de têduştîye awan bikê û qala rastîya cinîyan ê tarîxî bikê."

Endamê Komunê Şehîd Berxwedanî yê Taxa Şêmeqsûdî Elî Mistoyî îfade kerd ke bernameyê perwerdeyî seba ke komel de têdûştîya cînsîyetî bêra awankerdene girîng o.

Seba camêrdan bernameyê winasênî reyna do bêrê serûberkerdene.