Dewleta tirke ya îşxalkere pê teyarayêka bêmerdiman a çekdare (SÎHA) hêrişê dewa Helîncê ya rojhelatê Kobanê kerd. Hêriş de keyeyêkî ra ke ame hedefkerdene, 3 cinîyî şehîd bîyî. Nê cinîyam ra yew zî  Endama Koordînasyonê Kongreya Starî ya Firatî Zehra Berkel bîye.

Derheqê babete de Endama Koordînasyonê Kongreya Starî Remzîye Mihemed qisey kerd û hedefkerdişê endamanê Kongreya Starî ya Herêma Firatî şermezar kerd. Remzîye vat: ''Tirkîya rêxistinbîyayîşê cinîyan ê têkoşeran kena hedef.''

Remzîye wina dewam kerd: ''Verê cû îstîxbaratê Tirkîya Paris de cinîyê şorişgêrî Sakîne Cansiz û embazê aye hedef kerdbî. Reyna Vakurê Kurdîstanî de Sêvê û embazê aye hedef kerdbi. Nareye zî Zehra û embazê aye Kobanê de hedef kerdî. Hedefkerdişê endamanê Kongreya Starî hedefkerdişê xebatanê cinîyan o.

Ez bêvengîya hukmatê Rûsya ya vera hêrişan şermezar kena. Senî hayîya Rûsya pê nê hêrişan çin a.''
Remzîye peynîya qiseykerdişê xo de sozê pîlkerdişê têkoşînê azadîye û qesasê embazanê xo da.