Eşkerayîya Koordînasyonê PAJK'î de ame vatene, “Hevala ma Vîyan Sorane (Leyla Walî Huseyîn) vera komploya mîyandewletan ya ke vera Rayber Apoyî viraşta de çalakîya fedayîye kerde û tewrê xeleka adirî yê dorê Rayber Apoyî bîye. Serra 14’ine ya şehaetê aye de ma aye bi rêzdarî û bi minet yad kenîme. Bi têkoşînê xo yê serê xeta fedayî, bi azadîya Rayberîya xo ma do dilsozîya xo ya vîrardişî aye reyde bîyara ca.

PAJK'î vat ke Sorane tecrîdê serê Ocalanî qebul nêkerd û têkoşînê xo yê şorişgerî dîyarê azadîya Ocalanî kerd. Eşkerayîye wina dewam kerd:

“Hevala Vîyane kadroyanê rayberan ê têgêrayîşê ma ra yewe bîye û cinîyêka bi rûmet û bianor bîye ke adetê xoverrodayîşî yê Başûrê Kurdistanî bi xeta fedayî ya têkoşînê azadîye ra girê da. Esaretkerdişê Rayberî û komplo qebul nêkerde û têkoşînê xo yê şorişgêrî dîyarê Rayberî kerd. Hevala ma Vîyanê wina vengdayîş kerd, “No peyamê mi peyamê azadîye yo. Ez vengdayîş şima hemeyan rê kena; seba seveknayîşê Serek Apoyî û serkewtişî, çalakî û têkoşînî xurt bikerê!” Şarê ma bi têkoşînê xo yê bi serran vera komploye cewab dayo nê vengdayîşî. Şarê Kurdî esaretkerdişê Rayberîya xo tu cara qebul nêkerd û vera tecrîdî û sîstemê Îmraliyî timî zereyê têkoşînî de bi.

Komploya mîyandewletan kewena serra 21'ine, tecrîdkerdişê Rayberî zî her wextî ra zêdetir ameyo girankerdene û  vera nê zî çalakîyê xorrodayîşê girdî yenê kerdene. Serê rêça Laylayan de ke tarîxê ma yê azadî de her dem rayberîye kenê, bi rayberîya Leyla Guvene xoverrodayîş grevê vêşanîye, Kurdistan û heme cayanê dinya de yenê dewamkerdene. Bi nê çalakîyan yeno waştene ke, tecrîdkerdişê Rayberîye bêro werdaritene û şert û mercê seba kar û cuya azade ci rê bêra dayene. Grevê vêşanîye bî dewamê têkoşînê serê xeta azadî û fedayî ya hevalê ma yê şehîdê ke vera esaretê Rayberîye ameya qewimîyayene. Grevê vêşanîye do qetî ser bikewo, têcrîdî do bêro şikitene û fazîşm do birijîyo.”

Koordînasyonê PAJK'yî bale ante ke têkoşîn rayberîya cinîyanê Kurdî de roje bi roje beno xurt û wina dewam kerd: "Cinîye Kurdî nê têkoşînî deyndarê şehîdanê egîdan ê ke bi ruhê fedayî şer kerd, têkoşîn da û seba cinîyanê Kurdisanî û cîhanî hiş û vîrê azadî û xoverrodayîş xeliqna. Ganî bêro zanayene ke, ma do têkoşînê xo serê xeta şehîdanê xo de gird bikerîme û heta Rayber Apo yo ke xeliqnayoxê azadîya cinîyan o azad nêbo, ma do xeta xo ya xoverrodayîşî ra tawîz nêdanîme.”

Peynîya eşkerayîye de nê ameyî vatene: “Nê bingeyî de ma şarê xo yê welatperwerî, xoverrodoxanê grevê vêşanîye, çalakwanan û kesê ke seba azadîya Rayber Apoyî têkoşîn kenê hemeyan silam kenîme. Şexsê hevala Viyan Sorane de ma şehîdanê têkoşînê azadîye hemeyan reyêda bîne bi rêzdarî anîme vîrê xo û soza xo defêna dubarê kenîme ke ma do têkoşînê înan ser bikewîme.”