Mîhrîbane Durmaz bu nameyê ke embazanê ci nas kerdêne Berfîne Ararat Wan de çimê xo dinya rê akerdî. Gerîlaya YJA Starî Berfîne Ararata ke keyeyêko welatperwerî de bîye pîl zaf rewe gerîla û PKKyî nas kena. Serranê mektebî de pêra kewena mana cuya dima û lîse de tewrê falîyetanê ciwanîye bena. Hetê bînî ra kitabanê Rayberê Şarê Kurdî Abdullah Ocalanî wanena û resanê cewabanê persanê ke sereyê ci de yê.

Seba ke darbe bido dişmenî û zîhnîyetê camêrdî ke heqanê cinîyan binpay keno, ro 2010 de tewrê têgêrayîşê azadîye bena. Berfîna ke zaf lez musena koyan, sey gerîlaya cinîye şer kena, demo kilm de aver şina û bena fermandare. Bi felsefeya Ocalanî rêça Sakîne Cansizan de  Herêmanê Pawitişî yê Medya ra heta Dêrsimî têkoşîno aktîf reyra bena, darbenê giranan danê dişmenî ro û bena mîlatanêka fedaîye.

Berfîne Ararata ke xeyalê ci yo tewr pîl şîyayîşê Dêrsim o, roja raştbîyayîşê xeyalê xo rojaneyê xo de wina nusena.

"Ez ha şina  (27.03.2015)

Ez heyacanî ra fir dana. Ez do şirê Vakurî. 2 serrî yo ke ez şîyayîş pawena. Embazan vernîyazê mi qebul kerd. Çekuyî nêvejenê kêfmê bîyarî ziwan. Ez wazena perune rê vajî. Ez wazenê titîkê qilî ra biqîrî. Ez şina herra Dêrsimî. Cayo ke embaza ma yê têkoşînê pîlî Sara (Sakîne Cansiz) tede bîyî û embaze Zîlane bi ruhê qesasî şarê ma reyna resna serkewtişî, cayo ke cesaret û bawerî pîya bi awa Munzurî coş bîyî, ez şina ûja. Ez do qet mevindirî heqê hele bidî.''

Berfîne Ararata ke Sakîne Cansiz xo rê sey nimûne giretêne û ci rê hesret bî rojaneyê xo de wina qala ci kena:

"Hemra Sara rê,

Zerrîya mi semedê Dêrsimî vêşana bena tar, cayê ke ti tede ciwîyaya, naskerdişê nê cayan, herra ke to pay nayo ci, paynayîşê na herre, nizdîbîyayîşê to hêz dano mi. Eke merdim/e biwazo qey ganî azad mebo? Ma nê şarî rê deyndar ê. Ez çend xîret bikerî zî ez zana qîym nêkeno. Coka çiyo ke destê mi ra yeno ez do zafêrê naye xîret bikerî. Embaze Sara ez wazena ke layiqê to bî. Se beno wa bibo ez do xeyal û waştişanê xo camêverdî. Ez soz dana to ez do hemrayêka bihêz bî.''

Berfîne Ararata ke şertanê zehmetan de keda pîle daye, hêrişê dewleta tirke de 8ê hezîran a 2019î de Dêrsim de bi xoverdayîşê xurtî tewrê kerwanê şehîdan bîye.