Gerîla Bêrîtane serra 1996î de Sûrîye de dadîya xo ra bena û aslê xo de Bexdadî ra ya. Wexto ke babîyê ci Sûrîye de wezîfeyê xo yê leşkerî temam keno, ê reyna keyeyê xo hewilnenê Bexdad. Dadîya Bêrîtane wexto ke 13 serre bîye zewijîyaye ke babîyê ci zî o çax 100 serre bi. Bêrîtane vana: ''Keye de hîşmendîya nêrî asta berze de bîye. Babîyê mi 7 reyî zewijîyayo. Wexto ke babîyê mi merd dadîya mi reyna zewijîyaye. Ez zî hetê birayê xo de bîya pîl. Dima ke kekê mi merd, ez şîya hetê amika xo. Wexto ke ez 12 serre bîya, lajê amika mi reyde ez zewijnaye. Mêrdeyê mi tedaya mi kerdêne, yew domanê mi bi.''

Bêrîtane cuyêka zehmete ciwîyena û kewena tay cigêrayîşan. Bêrîyane qala hîkayeya tewrbîyayîşê xo yê seba gerîlayan wina kena: ''Wexto ke serra 2012î de vera Şingalî hêrişî ameyêne kerdene, mi embazanê xo rê vat ke ez qayîla şora Şingal. Embazanê mi zî qebul kerd û ez şîya. Wexto ke ez rewşa doman, cinî û şarê Şingalî dîye ez zaf kewta înan ver. Mi hîs kerd ke ê hewceyê ma yê.Ma zî seba şarê xo şer kerd. Ez 3 serran Şingal de menda. Şarê êzidîyan seba ke xo bipawo xo ver dano. Heta ke ez Şingalî ra vejîyaye şarî reyde bîya. Dima ke ez Şingalî ra agêraya ez ameya koyan.''

Bêrîtane wezîfeyê Şingalî ra dima wazena ke tewra têkoşînê Rojhelatî biba û tewra gerîlayanê YRKyî bena. Gerîla Bêrîtane vana: ''Mi waştêne ke ez her cayê Kurdîstanî de têkoşîn bikera û xo biresna cinîyan ê kurdan. Coka ez ameya Rojhelat. Tarîxê Rojhelatî pê cinîyan pir o. Ez zî seba ke biba îradeyêkê pîlî û vera tedayanê rejîmê Îranî yê serê cinîyan têkoşîn bikera tewra gerîlayan bîya.

Ganî cinîyê Rojhelat û Îranî wayîrê îradeyanê xo bivejîyê. Ez cinîyêka ereb a û seba azadîya Kurdîstanî têkoşîn kena. Çunke ez zanena ke wexto ke no têkoşîn ser bikewo şarê bînî zî do azad bibê. Ez venga cinîyan û ciwananê Rojhelat û Îranî dana ke vera sîstemî sereyê xo wedarê û tewrê têkoşînî bibê. Eke cinîyêke sere nêwedara, nêeşkena ke komel de biciwîya.''