Bi wesîleya 8ê Adare Roja Cinîyan ê Kedkaran a Dinya xeylêk bajaranê Vakurê Kurdîstanî de cinîyî  serkêşîya Meclîsê Cinîyan ê HDPyî û TJA de vejîyayî waran û vera şîdetê camêrd-dewlete hêrsê xo ard ziwan.

Amed de serkêşîya Platformê Cinîyan ê Dicle ê Amedî de Parka Roboskî ya qezaya Peyas de eşkerayîye ameye organîzekerdene la polîsan destûr nêda. Cinîyan bi slogananê Jin Jiyan Azadî û Hukmat îstîfa cewab da. Merkezê Heqanê Cinîyan ê Baroyê Amedî  zî verê Edlîyeya Dîyarbakirî de eşkerayîye daye.

Dêrsim de cinîyî serkêşîya Platformê Cinîyan de Kuçeyê Sanatî de ameyî têhet û heta Meydanê Seyîd Rizayî rayra şîyî. Tîya eşkerayîye ameye dayene.

Eşkerayîye çapemenîye hetê Sekretera Egîtîm Senî yê Dêrsimî Raîfe Yilmazî ra ameye wendene. Yilmaze vat: ''Ma bi dejî kewtî 8ê Adare. Dejê ma giran, zerrîya ma tenge û hêrsê ma ganî yo. Bi des hezeran merdimî birîndar ê, bi mîlyonna kesan bar kerd. Des bajaranê ma de rîyê rantî, efê îmarî ra merdimê ma ameyî qetilkerdene. Ma ewro pê paştîdayîşî birînanê xo pêşenê. Ma do hesabê na felaketa ke erdlerz de qewimîyaye bipersê. Ma veng danê heme cinîyan ke semedê cuya ke ma heq kerdo, ma biresê ci wa têkoşîn bêro xurtkerdene.''

Yilmaze vat: ''Ma Gulîstane Doku zî xo vîra nêkerde, heta ke aqibetê ci belî bibo ma do tim meydanan de bê.''

Sîlopîya de cinîyan ke rayraşîyayîşê 8ê Adare kerd, vat verê têkoşînê ma de çew nêeşkeno vindero.

Reyna Çewlîg, Xarpêt,Mêrdîn, Wan, Agirî, Mûş, Riha, Sêrt, Semsûr, Colemêrg û bajaran bînan de zî cinîyan bi çalakîyan şîdetê camêrd-dewlete yê vera cinîyan şermezar kerd û vat ê do çirey têkoşînê xo ra peyser game meerzê.