Komeleya Cinîyan a Starî serrgêra xo ya yewîne fîraz kerde û raporê xo yo serrane weşana. Rapor de yeno parekerdene ke prosesê janî de şîdetê vera cinîyan se ra 27,8 zêdîya. Komele warê komelkî, psîkolojîk û huqûqî de hetkarîye daye cinîyanê ke mexdûrê şîdetî bîyî.

Komele ra Rojbîne Bor îfade kerd ke Wan de awankerdişê komeleyêka cinîyan hewce bibi û vat: ''Wan de wextêk ma sey platformê cinîyan xebitîyayî. Dima ke platform pê KHK qefilîya û embazê ma tepişîyayî ma bire daye ke Wan de komeleyêke abikerê. Wan de ferasetê feodal xurt o û cinîyî maruzê şîdetî benê. Ma 6ê çeleyê 2020î de komele awan kerde. Ma Wan de pêro dezgeh û rêxistinanê cinîyan reyde roniştî û ma mexdûrê şîdetê camêrdan zîyaret kerd. Prosesê janî de şîdet se ra 27,8 zêdîya. Ma vera mekanîzmeya patrîyarkale paştî danê pêro alternatîfanê sey TJA. Ma do kargehan awan bikerê û perwerde bidê cinî, camêrd û domanan.''

Rojbîne da zanayene ke handîkapê înan o tewr pîl no yo: ''Handîkapê ma oyo ke ma nêeşkenê kuçeyan bixebitnê. Ma yenê îlegalîze û terorîzekerdene.Ma paştî danê Peymana Îstanbulî û ma seba ke paştî bidê ci eşkerayîyan danê. Ma şorişgêrê neteweya bindeste yê. Çîyê ke ma kenê nêdîyenê. Tîya de tedaya vera ma zêdêr a.Ma serrêke xebitîyayî la derheqê mi de 26 tehqîqatî dîyayî destpêkerdene. Nameyê nê kerdişî tacîzê dewlete yo.''