Grevê vêşanîye yo ke hetê Leyla Guvene ra amebi destpêkerdene, ewro hetê 281 kesanê girewteyan ra yeno domnayene. Naîf Îşçî yo ke Hepisxaneyê Girewteyî yê Tîpê T’yî yê Bandirma de girewte yo 10 rojî yo ke grevê vêşanîye de yo û maya ey Nebahat Îşçîye zî seba ke paştdarîye bido xoverdayîşê lajê xo mucadele kena û wazena ke wa pêro Kurdî zereyê nê mucadeleyî de cayê xo bigîrê.

Nebehat Îşçîye maya 6 domanan a û yew lajê xo xoverdayîşê Cizîre de kerdo vîndî û cenazeya ey hîna zî nêameya dîyayene. Seba ke keye de 4 domanê xo yê qijî estê mecburî xebetîna. Keyeyê Nebahat Îşçîye bi doliman hetê hêzanê dewlete ra ameyo sehnayene û keye de hema hema her kesî teda û şidet dîyo.

 ‘MA RA MEVAJE XOVERDAYÎŞÊ XO CAVERDE DAYÊ‘

Qaso ke Nebahat Îşçîye vana hêzanê dewlete çend dolimî ajanîye teklîfê aye kerda û no derheq de wina vana: “Seba ke îhtîyacîya ma estbîye, înan wina zanayêne ke ma muhtacê înan îme û benîme ajan. Maaşêko zêde, keye û seba wendişê domananê mi dibistan teklîfê mi kerd ke ez biba ajan. Mi ke qebul nêkerd, na dolime zî bi dek û dolaban, bi îftîrayan ameyî mi ser. O wext 4 domanê mi mendîbî û tewr pîlê înan zî Naîf bi û 14 serre bi. Linga ey şîkîyayîye bîye û nêeşkayêne rawirzo. Yew şewe eşt keyeyê ma ser û ez û Naîf ma ameyîme tepiştene.  Peyê cû ez ameya raverdayene la o tepişîya û 14 serrîya xo de erzîya bi hepisxane.“

Naîf 3 serrî Sêrt de ameyo pêgirewtene û peyê cû, seba ke hepisxane de kewto çalakîyan surgunê Hepisxaneyê Girewteyî yê Tîpê T’yî yê Bandirma bîyo. 5 serrî yo ke ey hepisxaneyî de yo û  seba ke tecrîd bêro wedaritene, 10 rojî yo ke kewto grevê vêşanîye. Qaso ke maya ey Nebahat Îşçîye vana bi telefon lajê xo de qisey kerdo û lajê aye ci ra vato: “Ma meraq meke dayê, ma baş îme. Xoverdayîşê xo bi qerardarîye domnenîme. Ma ra mevaje xoverdayîşê xo caverdê. Heta ke talebê ma nêrê ca ma do xoverdayîşê xo dewam bikerê.“

Nebahat Îşçîye vana laj hepisxane de, a zî teber de mucadeleyê xo dewam kenê û vana ancax yewîya Kurdan verê ney zilm û zordarîye birnena.