Lazimîya înan bi patronî çin a

Bi nameyê Elîf Degere û Fatma Ekîncîye de 2 cinîyê ke pîya dikanê terzî akerdî, eynî wext de vera zîhnîyetê camêrdî de zî têkoşîn danî. Cinîyî dîyar kenî ke lazimîya înan bi patronî çin a.

Bi nameyê Elîf Degere û Fatma Ekîncîye de 2 cinîyê ke qezaya Cizîrî ya Şirnexî de cuyenî, 4 serrî verê dikanê xo akerdî. Cinîyî no dikan de hem meslegê xo kenî û hem zî çîyê ke bi keda destan ameyî viraştene, roşenî û cinîyanê bînan zî beşdarê xebata xo kenî. Ekîncî û Degere dîyar kerdî ke ganî cinîyî hepsbîyayîşê keyeyî ra bixelisyî; çimkî cayê esil yê cinîyan ziqaq û kar o.

Elîf Degera 24 serreyî ke domanîya xo ra heta nika eleqeyê aye bi terzîtîye rê esto, gama xo ya sifteyîne kursê deştişî de erzena. Kursî ra dima karê deştişî domnena û dima ra embaza xo Fatma Ekîncî reyde qerarê akerdişê dikanî gêna. Degere vana ‘çira ma seba şarî bixebetyî?’ û wina domnena: “Seba ke ma karê xo bikerî, lazimîya ma bi patronî çin a.”

‘EKE CINÎYE BIWAZA EŞKENA HEME ÇÎ BIKERA’

Cinîyî dîyar kenî ke wexto ke înan seba akerdişê dikanî qerar girewto, keyeyê înan zî zaf destek dayo înan û wina dewam kerdî: “Armancê ma girdkerdişê karî yo. Labelê ge-ge ma problemê qumaşî cuyenî. Qumaşê rindî Stenbol de estî û îmkanê ma yê şîyayîşî çin o. Karê ma qedexeyê tebervejîyayîşê kuçeyan ra ver zaf baş bi, labelê nika ma aşmêk de ancax 2 hezar TL qezenç kenî. Qezencê ma heta nîmeyî kewto.”

Degere dewamê qiseykerdişê xo de wina vana: “Wexto ke meymanî yenî, ma ra persanê sey ‘şima senî akerd, şima kura ra musayî, şîyî kura û sewbîna’ pers kenî. Tayê nasê mi zî seba ke dikan akerî, qerar girewtî. Ez heme cinîyan ra vana, wa xo ra bawer bikerî, bes o. Eke cinîye biwazo, eşkena heme çî bikera. Tayê keyeyî nêwazenî keynayanê xo bidî xebetnayene. Keyeyê mi destek da mi. Tîya de yo muhîm qerar dayene yo. Wexto ke qerar ame dayene, dima ra heme çî beno asan.”