Mana û nameyê kede, estbîyayîş, awankerdişê erjê Asmîne Gelawêj (Leyla Çapin) serra xo ya ciwane de cuya xo seba şorişî dîyarî kerde. Roja ke dest pê têkoşînî kerd ra heta şehadetî bi hawayêkê bêemanî û bêmabenî tewrê şorişê bîye.

Asmîne Gelawêj bi dilpakîye, kedkarîye û embazîye xo dayêne şinasnayene. Berkîn Elvan qalê embaza xo Asmîne Gelawêj kerd:

"Mi a serra 2016î de nas kerde. O çax ma akademî de perwerde dîyêne. Asmîne her wext bi pêşmirîyayîşî nêzdîyê ambazan bîyêne. Her tim bicoş bîye û moral dayêne embazanê xo. Akademî de her çiqas îdarekara embazanê cinîyan bîye zî seba xo sey wezîfeyêk dîyêne ke bi embazanê camêrdan de zî eleqedar bîyêne û meseleyê înan çareser kerdêne. Hem bi têkilîya xo ya embazîye hem zî bi keda xo kerdêne ke hûrmet ci rê bêro mojnayene.

Meseleyan de bi xo eleqedar bîyêne û ê çareser kerdêne. Ge ge bi saetan ge ge bi rojan embazanê xo de eleqedar bîyêne. Merdimî fam kerdêne ke a bi nê hawayî tê gêrayêne û meseleyî çareser kerdêne. Merdimî cuya ci ra fam kerdêne ke milîtan û fermandarêka senî bîye. Bi nê hawayî rolê xo yê rayberî ard ca. Seba aye kese tim sey esas bîye.

Vakurê Kurdîstanî de ameye wezîfedarkerdene. Verî ke şora Eyaletê Amedî ma yewbînî dîyî û wextêko derg ma teraqe kerde. Eyaletê Amedî de bêters şîye dişmenî ser û bi hawayêkê çêrî şer kerd. Seke cuya xo de kerdêne şer de zî embazanê xo rê rayberîye kerde. 19ê nîsana 2018î de Eyaletê Amedî de tewrê kerwanê bêmergan bîye."