Hêrişê vera cinîyan çend şino zêdîyeno. Rojanê peyênan de hêrişê Vera Komelaya Cinîyan a Rosa û Têgêrayîşê Cinîyan ê Azadan (TJA) reyna operasyonê qirkerdişî yê vera Kongreya Şarî ya Demokratîke (KCD) de cinîyî raştê îşkenceyî ameyî. Reyna  meyê extîyarî û mayê wayîrê derguşan, domananê qijkekan ameyî tepiştene. Aktîvîsta TJA sevîl Rojbîn Çetîn bi îşkenceyê kutîkî ameyî destbendkerdene û nezarat de raştê îşkenceyî ameye ke dima ra ameye tepiştene.

Endama Komelaya Cinîyan a  Rosa Rûkene Erguneş û Vervatoxa Mecîsê Cinîyan ê HDPyî yê Îstanbulî Besere Çelîk derheqê şîdetê vera cinîyan û xoverdayîşê cinîyan de ANFyî rê qisey kerd.

Endama Komelaya Cinîyan a  Rosa Rûkene Erguneş hêrişê vera cinîyan û qefilnayîşê dezgehanê cinîyan vist vîrî û vat: ''Ma taxa, dewe û xeylêk cayan bînan de merkezê akerdî. Hûmara keyayanê pawitişê cinîyan zêdîyaye. Cinîyan dest pê kerd ke problemanê xo bi destê xo çareser bikerê. Bi KHKyan nê merkezî ameyî qefilnayene ke her kes wa keyeyê xo di bi problemê xo meşkul bo. Cayo kolektîf yê şarî ra tersayî coka waşt ke verê cu bigerê. Hukmat hetêk ra xo sey paştgerê cinîyan ramojneno hetê bînî ra Kurdîstan de vera cinîyan tim hêriş keno. Na dirîyîye ya. La ê se kene wa biker no meeşkê vernîya ma bigêrê.''

Vervatoxa Mecîsê Cinîyan ê HDPyî yê Îstanbulî Besere Çelîk zî bale ante ke wextê herinda krizê weşî û ekonomî de hukmat vera dezgahanê cinîyan hêriş keno û vat: ''Îqtîdar rêxistinbîyayîşê cinîyan nêazeno, hêzê cinîyan ra terseno coka tim hêriş keno.  Tewr zaf zî sîstemê hemserekîye hedef gênê ke xeta ma ya mor a. Reyna bi qanûna nêweyan hêrişê vera cinîyan û îstîsmarê domanan kerd meşrû. Hêrişê vera Rojbîne Çetîn dişmenîya înan a vera kurdan û cinîyan fîneno çiman ver. La ma cinîyî do peyser game nêerzê.  Ma paştdayîş û têhebîyayîş esas gênê.''