‘Ma do rewşa Tugluke Konseya Ewropa de bîyarê rojdem’

Sîyasetmedare Bedîa Ozgokçe da zanayene ke ganî rewşa tepişteyanê nêweşan bêra berdene bi rojdemê dezgehanê Ewropa û vat hedefê înan no yo ke ê do na babete berê rojdemê roniştişê Konseya Ewropayî yê 24ê Çeleyî.

Sîyasetmedara kurde Aysele Tugluka ke Zîndanê Kandira de tepişîyena rixmê nêweşîyanê xo yê giranan û raporê Fakulteyê Tibî yê Zanîngehê Kocaelî zî pê raporê 'eşkena zîndan de bimana' yê Dezgehê Tipê Edlî vera nêdîyena.

Seba Aysele Tugluk kampanyaya ''Seba Aysele Tugluk 1000 Cinîyî'' dîyabî destpêkerdene. Heta nika her cayê dinya de bi hezaran cinîyan îmza daye kampanya. Hemşaredara Wanî Bedîa Ozgokçeya ke herinda ci de qeyûm amebî tayînkerdene derheqê rewşa Aysele Tugluk û tepişteyanê nêweşan de Jinnewsî rê qisey kerd. 

Bedîa Ozgokçe pare kerd ke Aysele Tugluk hetê têkoşînê azadîya cinîyan ra profîlêka xurt a û vat: ''Aysele Tugluk û cinîyê sey ma pê rayanê şarî ameyî weçînayene. Aysele qala heqî kerdêne. Coka yena muhakemekerdene. Seba ke aye qala nasnameyî kerdêne ameye sûcdarkerdene.  Aysele hemsereka verêne bîye. Îqtîdaro ke dişmenê sîstemê hemserekîye yo Aysele ra qesasê xo gêno.''

Bedîa Ozgokçe bale ante rewşa tepişteyanê nêweşan ser û vat: ''Zîndanan de îşkenceyê pîlî estê. Dewlete heman dewlet a. Merdimî bi hawayêkê keyfî tepişîyenê û erzîyenê zîndanan. Ma bi mektubêke bale ante rewşa Aysele Tugluk û tepişteyanê nêweşan ser. Ma na mektube şawite dezgehanê Ewropa.  24ê çeleyî de kombîyayîşê Konseya Ewropa do bêro kerdene. Ma do babeta tepişteyanê nêweşan berê uca zî. Ma seba tepişteyanê nêweşan do xîret bikerê. Wa her kes veng bido vengê tepişteyan. ''