Endama Meclîsê Cinîyan ê PYDyî Sara Xelîl derheqê xoverdayîş û têkoşînê cinîyan o ke Kobanê de dest pêkerdo de, ANFyî rê qisey kerd.

Sara Xelîl vist vîrî ke sey ê cayanê bînan Rojawan de zî verî sîstemo feodal bitesîr bi û vat: ''Bi hezaran cinîyî bi felsefeya Rayberîye ameyî xo ser, înan verê xo da koyanê Kurdîstanî. Nê cinîyî bîyî serkêşê ma. Şehîda verêne ya Kobanê Şehîde Dîcle bîye ke aye ma rê bingeyêko pîl awan kerd. Cinîyanê Rojawanî têkoşînê gerîlayanê cinîyan ra îlham girewt. Kobanê de sîstemê eşîran ra rolê cinîyan çin bi. Camêrdan çarenûsê cinîyan dîyar kerdêne û cinîyan şîdet sey çarenusê xo qebul kerdêne. Kobanê de cinîyan bi nimitişî xo rêxistin kerd. Çunke hetêkî ra zî tedaya rejîmê Baasî est bîye. Cinîyan rixmê tedaya camêrdan û dewlete zî waşt ke felsefeya Rayber Apoyî bişinasê. 

Nê xîret, ked û xoverdayîşê cinîyî bîyî sebebê awankerdişê têgêrayîşêkê cinîyan. O çax Kobanê de konferansêko pîl ame kerdene. 150 cinîyî beşdarê nê konferansî bîyî û tede 8 kesan ra meclîsêk ame awankerdene. Yewîya Starî bi nê hawayî ronîyaye. Cinîyan zor û zehmetî dîyî la têkoşînê xo ra fek vera nêda. Eqsê ci hîna zaf tewrê têkoşînî bîyî."

Sara Xelîl ard ziwan ke têkoşînê cinîyan bingeyê Şorişê 19ê Temmuze amade kerdo û vat: ''Yewîya Starî ra dima Kongreya Starî ronîyaye. Dezgehê ke meseleyanê cinîyan çareser nêkenê, cinîyan pawenê û rêxistin kenê ronîyayî. Prosesê Şorişê 19ê Temmuze ra dima gef û hêrişan dewam kerd. Şexsê YPJyî de têkoşînê vera DAÎŞî zaf veng vet. Dima ke Kobanê azad bîye, bi hezaran cinîyî teberê Kurdîstanî ra ameyî û tewrê şerî bîyî. Înan waştêne ke YPJ bişinasnê, xeta azadîye bimusê. O çax Rayber Apo zî dinya ser de hîna zaf şinasîya. Şorişo ke Kobanê de dest pêkerd global bi. Coka ma deyndarê Rayber Apoyî yê. Nika ra pey zî têkoşînê ma seba pêro cinîyan ê dinya do dewam bikero. Ma do seserra 21. bikerê seserra azadîya cinîyî û cinîyî do xo mîyanê têgêrayîşî de bivînê.''