Gerîlayê HPGyî Egîd Îpeko  23ê gulana 2017î de Dêrsim şehîd kewt rixmê heme muracatanê keyeyê ci cenaza nêameye dayene. Cenazaya Îpekî vizêr badê hîrê serran pê kargo keyeyê ci rê şawîyaye. Keyeyî cenazaya xo taxa Tîzyanî ya qezaya Artuklu ya Mêrdinî de binê abluqa de defin kerde.

Maya Egîd Îpekî Halise Aksoy derheqê babete de Ajansê Xeberan ê Mezopotamya rê qisey kerd. Aksoye ard ziwan ke Edlîyeya Amedî ra înan rê xebere ameye ke kargo înan esto û ê şîyî ûca eşnawito ke meyîtê lajê înan Dêrsim ra pê posta şawîyayo. Aksoye pê posta şawitişê cenaza sey wehşetî name kerd û vat: ''Seke xebera şehadetê lajê mi ameye ra nate hîrê serrî yo ma Meletî, Dêrsim û Îstanbul de edlîye ra edlîye semedê girewtişê cenaz gêrêyî û ma testê DNA viraştî la rixmê heme muractanê ma cenazaya ma nêdîyaye. Ma ra tim vatêne şirê rêxistine ra cenaza biweze.''

Aksoye wina dewam kerd: ''Bado ke cenazaya lajê mi Îstanbulî ra ameye Amed tîya ra bi posta şawîyaya Dêrsim badê îtîrazê ma reyna pê posta şawîyaye Amed. Gama ke ez Istanbul de bîya Elîyeya Amedî ra gêrayî ma û vat destê înan de dosyayêke esta û waşt ke ez şirê bîgî. Ez perseya mi vat çîyo înan vat dosyayêka mîyan a. 10 Rojî dima ra Dêrsim ra gêrayî mi vat dosyeyêk destê înan de ya. Mi zî vat bişawê  Amed. Kagito ke mi rê ame serê ci de emanet nuştene. Gama ke ez şîya Edlîyeya Amedî mi vat 'emanet çîyo' înan vat 'esteyê şima ameyî zereyê qutî de yê'.Ez ewnîya paketê mi ûca ya Egîtê mi zereyê paketê PTTyî de yo. Mi estê yê xo girewtî ameya keye.''

Maye Aksoye dej û hêrsê xo wîna ard ziwan: ''Êyê ke wina kenê qet hîsê înan ê merdimîye çîn a.  Kesê ke wayîrê vîcdanîyê nêeşkenê çîyo wînayên bikerê. Esteyê lajê mi pê kargo şawitî. No wehşet o. Qet yew dîn naye qebûl nêkeno. Milimanîye de caye naye çîn o. Lajê ma yo ke ma bi keda pîle kerd gird sey çî-mî sey çîyêkê bêqiymet danê destê ma. Wextê definkerdiş zî destûr nêda mele zî tewrê definkerdişî bo. La ê se kene wa bikerê têrsê ma înan ra çîno. Ez tîya ra veng dana keyeyanê ke meyîtê înan Goristanê Garzanî ra ameyî diznayene wa wayîrê estayanê xo bivejê. Bedelê ci çi beno wa bibo ma do zulmê înan qebûl mekerê verê înan de çok nêdê.

Aksoye ard ziwan ke lajê ci hema serranê xo yê qican de raştê îşkenceyê dewlete ame û vat: ''Lajê mi xebatanê ciwanî ra ame destbendkerdene û dima ke serbest ame veradayene derheqê ci de heta 30 serran ceza ameye waştene. Gama ke mi vatêne lajê mi keye de roniş vatêne 'la eyb nîyo nameyê mi Egîd o ez senî keye de ronişî'. Lajê mi sey nameyê xo Egîd bi ma pê ey sereberz ê.''