Tepişteyanê PKK û PAJKî 27ê teşrîna peyêne de zîndananê Tirkîya û Vakurê Kurdîstanî de vera tecrîdkerdişê Rayberê Şarê Kurdî Abdullah Ocalanî û binpaykerdişê heqanê tepişteyan grevê vêşanîye dabi destpêkerdene. Grev roja 76. de dewam keno. Grevê vêşanîye yê 2018î de Mayanê Laçiksipîyan ra Hasrete Karaman, Nariçe Temel û Halîme Kahraman seba ke hîsger biba venga rayaumûmîye dabi.

Ma têkoşînê înan de ganî tepişteyan teyna nêverdê

Hasrete Karaman ard ziwan ke na rewşe bêhuqûqî ya û ganî cade tecrîdê vera Rayberê Şarê Kurdî Abdullah Ocalanî bêro wedaritene. Dayîke Hasrete vat: ''Tepişteyî seba heqê xo yê tewr meşrûyî heqê ciwîyayîşî 76 rojî yo grev kenê. Ganî destûr bidîyo ke Birêz Ocalan keye û  avûkatanê xo bivîno. Nê tecrîd û grevê vêşanîye de ma nêeşkenê nan biwerê. Zereyê ma nêgêno. Grevê vêşanîye yê 2018î de 8 tepişteyan dinyaya xo bedilnabi. Seba ke tepişteyî nêmirê ganî selahîyetdarî gamêke bierzê. Ez venga aktîvîstanê heqanê merdiman dana ke wa waştişanê tepişteyan her ca de biqîrê. Ma têkoşînê înan de ganî tepişteyan teyna nêverdê.'' 

Zerrîya ma vêşena

Dayîke Nariçe Temel zî îfade kerd ke semedê  grevê vêşanîye yê 2018î ra ê qerqilîyenê û vat: ''Sey dadîyan hînî zerrîya ma vêşena. Wa dewlete nê tewirê xo ra cade fek vera bida. Wa her kes seba ke grevê vêşanîye bibo rojdem têbigêro.''

Ganî ma bibê vengê zîndanan

Halîme Kahraman zî bela ante tecrîdê Îmraliyî ser û vat: ''Wa tepişteyî nêmirê, waştişê înan qebul bibê. Seba ke tepişteyî nêmirê wa berê Îmraliyî bêrê akerdene.  Ganî ma bibê vengê zîndanan. Ganî ma vera tecrîdî têkoşîn bikerê. Têna kurdî nê wa her kes vera nê kerdişan vajê 'bes o.' Wa pêro dadîyî bibê yew û biqîrê.''