Mayê Şemeyî seba ke aqûbetê vîndîbîyayenê xo bipersî reya 707. de hîna meydanan de bî. Parlameteranê HDPyî ra Huda Kaya û Garo Paylan zî tede xeylê îdarekarê dezgehê sivilan zî tewrê çalakîye biyî û paştî daye mayan.

Rixmê ablûqaya polîsan mayan bi eşkerayîyêk waşt ke wa aqubetê qijanê înan eşkera bo û qetilkarî bêrî cezakerdene.

Çalakîye  no hewte de Abdulkerîm Yurtseven,  Mîktat Ozeken û Mîktat Munur ke 27 ê Têşrîna verêna 1995î de Gever de binê çiman de ameyî vînkerdene, seba înan edelat ame waştene.

Bado zî maya Ferhat Tepeyî ke wexto ke rojnamegerîya Ozgur Gundemî kerdêne binê çiman de ame vînkerdêne, Zubeyde Tepe qisey kerd.

Tepe Suleyman Soyluyî ra hêrsê xo ard ziwan û wina domna:‘‘ Lajê mi Ferhat Tepe muxabîrê Ozgur Gundemî bi. Soylu vano PKKyî nê remnayî. PKK lajê mi nêremna, Tugaya Qesasî yê Tirkî lajê mi remna. Lajê mi Bedlîs ra remna berd Amed û ewja de bi îşkenceyî qetil kerd.‘'