Mayanê Haştîye yê Amedî bi vera poltîkayanê hemkarîyeyî yê Başûrê Kurdîstanî eşkerayîye daye. Bi nameyê mayan Emîne Denîz û Meryemê Turan qisey kerd.

Mayan bale ante muhîya yewbîyayîşê şarê kurdî ser û vat: ''Eke Başûrê Kurdîstanî de pêkewtişêk vejîyo, no xizmetê kurdan nêkeno. Coka ganî Mesûd Barzanî cade mudaxaleyê na rewşe bikero ke verê qewimîyayîşanê xiraban bêro girewtene. Ma semedê dîyalogî veng danê her di hetan zî. Wa şerê birakujî mero kerdene. Hînî bes o! Ma hinî nêwezanê hesire û gonî vînê. Ma sey mayan tim hetê haştîye de yê. Wa Barzanî destê xo yê haştîye ma rê bikero derg. Ganî PDK kayanê leyminan ê dewletanê bînan rê mexapîyo. Wa serê gonîya ciwanan de polîtîka nêro kerdene. Wa pê gonîya qicanê ma sîyaset nêro kerdene. Eke Barzanî ewro ûca rehet nişeno ro, no xeyrê kurdan ra o. Hinî Bes o! Wa gonîya ciwanan nêrişîyo.''