Meclîsê Cinîyan ê HDPyî dosyaya hemserekîye ya bi şîarê ''Seba temsîlîyetê têdûştî û tewrbîyayîşê têdûştî hemserekîye'' vizêr Amed de pê kombîyayîşêkî daye şinasnayene.

Hemvervatoxa Meclîsê Cinîyan ê HDPyî Ayşe acar Başaran kombîyayîş de hem kurdkî hem zî tirkî eşkerayîye wende.

Başarane vat: ''Caardişê sîstemê qeyûmî têna dişmenê kurdan nê, dişmenê cinîyan o zî. Ma seba ke naye eşkera bikerê tîya de yê.

Dişmenîya vera cinîyan parçeyê dişmenîya vera kurdan o. 3 cinîyê ke Kobanê de ameyî qetilkerdene bi hawayêkê tesadufîyî nêameyî weçînayene. Nê cinîyî ameyî hedefkerdene. Ma nê qirkerdişan Qirkerdişê Parisî yê 2015î ra, Sîlopî ra zanenê. No hêriş vea sîstemo ke temsîlîyetê têdûştî yê cinîyan paweno, zî ame kerdene.

Sîstemê hemserekîye hamleya vera serwerîya seserran a camêrdan a. Hemserekîye nîşanêk o ke mojneno ke cinîyî eşkenê îdare de zî ca bigêrê.

AKP roja destpêkê ya îqtîdarê xo ra heta nika tim cinîyan rê mehqûlîye ferz kerde, cinîyî zereyê keyeyî de pênase kerdî. No îqtîdar ewro hêrişê hemserekîye keno. Çunke no sîstem seba ci bitehluke yo.

Qet yew hêriş nêeşkeno ma rayîrê ma ra biaçarno. Prosesê qeyûman de 21 embazê ma yê cinîyî ameyî destbendkerdene. Înan ra 9ê ci tepişte yê, 4ê ci zî keye de yenê hepiskerdene.Ê vanê qey ma pê nê hêrişan apey game erzene. La ma do nêerzê.

AKP cinîyan keno mexdûr û pê zorî keno ke cinîyî ci rê bîat bikerê. Coka qeyûman hêverî dezgehê cinîyan qefilnayî.

Ma do nêverdê ke şima pêro waran pê camêrdan debikerê. Ma reyna venga ê camêrdanê ke ma rê vanê 'bibê mehqûl, têkoşînê azadîye mekerê' danê ke şima do nêeşkê bikerê ke ma gamêke apey bierzê. Ma do şima vera camêrdkerdiş, qeyûmkerdişî hîna azad bikerê, bivurnê. Ma do nê erdî de sîstemê azadîya cinîyan do awan bikerê.''