Meclîsê Cinîyan ê Partîya Çep a Hewze derheqê weçînayîşanê 14ê Gulane de otelêla Anqara de bi lansmanî beyannameyê weçînayîşî yê cinîyan eşkera kerd

Hemvervatoxa HDKyî Esengule Demîr, Hemvervatoxa Partîya Çep a Hewze Çîgdeme Kiliçgun Uçar, Hemsereka HDPyî Pervîne Buldan zî tede xeylêk serek û hemserekê Îtîfaqê Kede û Azadîye, endam û îdarekarê dezgeh û rêxistinan û Mayê Haştîye tewrê lansmanî bîyî.

Dadîya Denîze Poyraz Fehîme Poyraz û Lîsa Çalana ke Qirkerdişê Meydanê Îstasyonî yê Amedî de birîndar bibî, meymanê taybetî bîyî. Cinîyî bi tîlîlî û çepikan kewtî salone û înan govende girewte.

Lansman de hêverî Hemsereka Pêroyî ya HDPyî Pervîne Buldan qisey kerd û vat: ''Cinîyî wayîrê tewirêkê qerardarî yê ke hêvî xurtêr kenê. Nê weçînayîşî weçînayîşê cinîyan ê. Serkewtişê ci zî serkewtişê ma yo. Ma bi Îtîfaqê Kede û Azadîye, bi îtîfaqê cinîyan bi xurtî kewenê weçînayîşî. Îqtîdarê AKP-MHPyî 20 serrî yo cinîyan rê zulm û teda keno û cinîyan mîyanê xizanî, şîdet, bêkarî û koletîye de verdeno. La ma do qetî hesabê ney bipersê. Seba binvistişê nê îqtîdarî, qedînayîşê şîdetî, wedaritişê tecrîd û faşîzmî ma hê yenê. Ma do qetî rayîr nêdê îtîfaqanê dişmenanê cinîyan. 14ê Gulane de do seba cinîyan raydayîş vurîyayîşê rejîmî bibo. Coka ma do 14ê Gulane de cewabêkê xurtî bidê. Cinîyî hêzê vurîyayîş û vurnayîşî yê, hêzê newe ra awankerdişî yê.''

Buldane ra dima Hemvervatoxa Partîya Çep a Keske Çîgdeme Kiliçgun Uçar qisey kerd. Uçare bi kirdkî selam da cinîyan. Uçare vat: ''Seba azadî, heq, huqûq, kede û edaletî ma do têkoşînê xo rê dewam bikerê. Seba pîlkerdişê têkoşînê azadîye ma Rayîrê Hîrêyînî de şorê û cuya newîye awan bikerê. Vera cinîyan her roje teda û şîdetê camêrdan û îqtîdarî zêdîyenê. Partîya Çep a Hewze dûştê nê mezgî ya. Adresê demokrasî ya. Ez venga pêro cinîyan dana ke nê adresî de bêrê pêser û pîya cuya newîye awan bikerê. Ma soz danê ke nê îqtîdarî ra hesab bipersê û ey birijnê. Ma hê yenê!''

Lansman de dima mesajê cinîyan ê tepişteyan ame wendene.

Mesajan ra dima Vervatoxa Meclîsê Cinîyan ê HDPyî Ayşe Acar Başaran beyannameyê weçînayîşî yê cinîyan wend.

Beyanname bi kilmî wina yo:

''Ma seba ke peynîya şîdetê camêrd-dewlete bîyarê yenê. Ma do îdareyanê şîdetperestan bi cinîyan do bivurnê!

● Ma do Peymana Îstanbulî newe ra bîyarê û qanûnê 6284î bîyarê ca.

● Ma do Xeta 'ALO Şîdetî' newe ra awan bikerê.

● Mexdûranê şîdetî rê do xizmetê bi ziwanê dayîke pêşkêş bikerê.

● Ma do beyanê cinîyan esas bikerê.

●Ma do warê şîdetî de hêzanê asayîşî yê cinîyan, dadger û dozgeran ê cinîyan wezîfedar bikerê.

● Ma derheqê têdûştîya cînsîye de perwerdeyan bidê

● Her şaristan de cinîyan rê keyeyê bextwaştişî abikerê, seba mexdûranê şîdetî waranê cuye yê azadan awan bikerê.

● Sûcê şîdetî de cezaya faîlan kêm nêkerê, pê qanûnan verê zewajê domanan bigêrê.

● Afatanê xozayîyan de vera şîdetê serê cinîyan budçeyêke awan bikerê.

Ma seba ke xizanîya cinîyan biqedînê do bi cinîyan bivurîyê! Ma seba ke keda cinîyan nêra werdene û verê xizanîya cinîyan bigêrê hê yenê!

● Ma do peynîya karanê cînsîperestan, cîyakerîya kargehan, mobîngî bîyarê. Ma do heqê teqawutbîyayîşî û garantîya komelkîye bidê pêro cinîyan. Ma do cinîyan rê waranê îstîhdamî hîra bikerê. 'Karo têdûşt-meaşo têdûşt' do aktîf bibo. Ma do paştî bidê kooperatîfanê cinîyan. Ma do 8ê Adare bikerê tehtîlê resmîy. Kargehan de cîyakerî wedarnê. Ma do şertanê xebitîyayîşî yê cinîyan ê karkeranê mewsîmî raşt bikerê.

Seba ke peynîya polîtîkayanê şerê taybetî bigêrê ma hê yenê! Ê kesê ke pê madeyanê tîryakî, fuhuş, ajankerdişî ûsn. wazenê îradeyê cinîyan bişiknê, ma do têkoşînê vera nê kesan ra fek vera nêdê!

● Wezîfedarê aasayîşî yê ke nê sûcan kenê, ma do înan muhakeme bikerê. Ma do Mehkemeya Îhtîsasî ya Cinîyan ronê. Ma do vera polîtîkayanê şerê taybetî xebatanê xopawitişî bîyarê ca. Ma do vera tîryakîtîya madeyan torra kontrol û teqîbî ronê.

Seba ke ma peynîya sûcanê nefretî bigêrê do bi cinîyan bivurnê! Ma do nê rejîmê şîdetî bi cinîyan bivurnê!

● Ma do zîndanan de peynîya tecrîd, îşkence, vêşnayîşê înfazî, surgun ûsn. bîyarê. Cîyakerîya vera endamanê LGBTI+ biqedînê. Seba ke verê sûcanê nefretî bigêrê qanûnan raşt bikerê. Ma do tedeyîya perwerdeyî de cabidê têdûştîya cînsîye.

Ma seba azadîye û laîkîye hê yenê!

● Ma do meverdê îqtîdar ma pênase bikero. Ma do nêverdê çew beden, kesayet û ameyoxê ma ser o qerar bido. Ma do nêverdê dewlete bawerîyan kontrol bikera.

● Ma do azadî, asayîş û heqanê cinîyan ê astengdaran bipawê.

● Ma do bikerê ke cinîyan her ca de xo bi asayî hîs bikerê.

● Ma do waranê afatan de têdûştîya cînsîyî bîyarê ca, seba cinîyan waranê cuye awan bikerê, hetkarîya psîkolojîke bidê cinîyan ê mexdûran û domananê sêwir û vînîbîyayeyan bipawê.

● Ma do têkoşînê ekolojîkî rê dewam bikerê, zîretî û kooperatîfan teşwîq bikerê, şaristananê cinîyan ê ekolojîkan awan bikerê.

● Ma do perwerdeyê bêpere, têdûşt, demokratîk û zanistî bîyarê ca. Ma do bursî bidê  cinîyan ê wendekaran.

● Ma do cinîyan rê bernameyanê perwerdeyê bi ziwanê dayîke serûber bikerê.

● Ma do xizmetanê weşîye bikerê bêpere û têdûşt, her taxe de 'Merkezê Weşîye yê Cinîyan' awan bikerê. Ma do seba kurtajî qerarê cinîyan bikerê esas. Ma do derzînanê kanserê rahîmî (HPV) bêpere bikerê.

● Ma do cinîyan ê multecî û koçberan rê waranê bextwaştişî û mendîşî ronê, nê cinîyan îstîhdam bikerê, destekê komelkî bidê înan, şîdetê verê înan bigêrê û sûcanê şîdetî yê vera cinîyan ê multecî û koçberan de cezayanê giranan bidê sûcdaran.

Ma hê tîya de yê! Ma wisarê 2023yî de ver bi komara demokratîke, cinîyan reyde şinê! Ma pê vate, tîlîlî, hêvî û hûyayîşê xo, pîya seba vurnayîşî yenê.''