Nizdê des rojan o ke dewleta tirke ya îşxalkere û çeteyê ci hêrişê Minbic û dormeyê ci kenê.  Dewleta tirke  ya îşxalkera ke pîya bi çeteyanê xo hêrişê xo zêdînayî û bi medyaya şerê taybetî zûra destfînayîşê bajarî vila kena ginaye desê şervananê Meclîsê Leşkerî yê Minbic û El Babî ro.

Meclîsê Leşkerî yê Minbicî derheqê rewşa peyêne de eşkerayîye daye û nê vatî: ''Bi rojan o dewleta tirke û çeteyê ci hêrişê herême û bajarê ma kenê. Bitaybetî nê çar rojanê peyênan de hêzo pîl ê çeteyan bi heme çekanê modernen û droneyanê dewleta tirke tewrê hêrişan bi. Mesela desî ra zafêr SÎHAyê bi tîpê Akinci herişan de ca girewt. No hêrişo gird hetê generalanê dewleta tirke ra yeno koordînekerdene.''

Eşkerayîye de derheqê hêrişan de nê ameyî vatene: ''Çar rojî yo ke vera hêrişê nê çeteyan û artêşa tirke ya îşxalkere şervanê Meclîsê Leşkerî yê Minbicî cepheyê tewr verênî de şer kenê, derba girane daye îşxalkeran ro û hêrişê dişmenî şiknayî. Înanê ke hêrişê herême kerde do poşman bibê. Ma bi têkoşînê xo yê vera hêrişê çeteyan û dewleta tirke ya îşxalkere kewnê merhaleya diyîne ya pawitişî. Ma do bi taktîk û metodanê cîya cîyayan dişmenî serûbin bikerê û seba ke hêrişê herêma kerd înan poşman bikerê.''

Eşkerayîye de ame vîrvistene ke îşxalkerê ke nêeşkayî vera şervananê Meclîsê Leşkerî yê Minbicî aver şirê hêrişê sîvîlan kenê û nê ameyî vatene: ''Ma sey hêzanê Meclîsê Leşkerî yê Minbicî qerardar ê ke ma do dewleta tirke ya îşxalere û çeteyanê ci ra qesas bigîrê. Nê çeteyê wehşîyî seba ke nêeşkenê hêzanê ma hêrişê sîvîlan kenê, doman û cinîyan ê herêma ma rê destê xo derg kenê. Ma do hesabê nê înan ra bipersê. Ma soz danê ke ma do bajarê xo yê rindî Minbicî çeteyanê wehşîyan û dewleta tirke ya îşxalkere ra bipawê.''