Endamê Parlamentoyê Eyaletê Berlinî û Wekîlê Partîya Çepe (Die Linke) Ferhat Koçakî qetilkerdişê Nazim Daştanî û Cîhane Bîlgîn şermezar kerd.

Koçakî da zanayene ke hêrişê îşxalî û qirkerdişî yê dewleta tirke yê vera Rojawanî û operasyonê ci yê vera Başûrê Kurdîstanî binpaykerdişê heqanê merdiman û huqûqê mîyanneteweyî yê. Koçakî vat: ''Dewleta tirke Başûr û Rojawan de sivîlan qetil kena.''

Koçakî dîyar kerd ke seba demokratîkbîyayîşê Sûrîye firsend est o vat: ''Komê ke qaşo serewedaritox ê cîyareng ê. Mîyanê nînan de paştgîrê DAÎŞ û El Qayîde zî est ê. Tirkîyaya ke nê koman kontrol kena wazena Îdareyê Xoserî yê kurdan çin bikera.''

Koçakî qetilkerdişê Nazim Daştanî û Cîhane Bîlgîn şermezar kerd û vat: ''Nê qirkerdişî dewamê hêrişanê Tirkîya yê vera çepemenîye yê û sûcê şerî yê.''

Koçakî seba ke çekan roşena Tirkîya dewleta Almanya bi tûjî rexne kerde û vat: ''Artêşa tirke herêmanê kurdan de heqanê şarî binpay kena û nê operasyonan de çekanê almanan şuxilnena. Ganî hukmatê Almanya verê binpaykerdişê heqan de wina bêveng nêmana.''

Ferhat Koçakî krîmînalîzekerdişê aktîvîstan û komeleyanê kurdan ê Almanya rexne kerd û venga pawitoxanê heqanê merdiman û têgêrayîşanê çepe da ke hîna zaf paştî bidê kurdan.