Sakîne Cansiz, Fîdan Dogan û Leyla Şeylemez 9ê çeleyê 2013yî de paytextê Fransa Paris de ameybî qetilkerdene. Bi wesîleya serrgêra Qirkerdişê Parisî seranserê Ewropa de do çalakîyî bêrê kerdene. Endama TJK-E Nûpele Munzur semedê tewrbîyayîşê çalakîyan veng da.

Munzure şehîdê Parisî bihurmet yad kerdî û vat têkoşînê semedê caardişê edaletî dewam keno. Munzure vat: ''Ma kiştoxan nas kenê û zanê ke waştişê înan çîyo. Ma zanê ke embaza Sara qey ameye vîjnayene. Şexsê embaza Sara de  Têgêrayîşê Cinîyan ê Kurdan ame hedefgirewtene. Rayberîye vat 'Ha mi, ha Sara bikişê' û qirkerdiş sey dewamê Qirkerdişê Dêrsimî name kerd. Reyna vîjnayîşê Rojbîne û Leyla zî tesaduf nêbi. Heta ke qirkerdiş nêro eşkerakerdene û Fransa zî hemparê sûcî ya.

Çarçewa çalakîyanê vîrardiş û hesabpersayîşî de heme welatan de do 5ê çeleyî de verê konsolosxane û sersefîrîyanê Franse de do çalakîyî bêrê kerdene. Paris de do 5ê çeleyî de saete 11:00 de verê Buroyê Enformasyonî yê Kurdan de aktîvîteya vîrardişî bêro kerdene. Dezgehê dostî zî do tewrê aktîvîte bibê. Rayraşîyayîşo pîl zî do 8ê çeleyî de cayê qirkerdişî Gare Du Nord de bêro kerdene. Yeno pawitene ke pîya kurdan xeylêk sîyasetmedarê firansizî û rêxistinê cinîyan ê femînîstî zî tewrê rayraşîyayîşî bibê.9ê çeleyî de bi wesîleya serrgêra qirkerdişî do verê Buroyê Enformasyonî yê Kurdan de aktîvîteya vîrardişî bêro kerdene. Me veng danê her kesî ke semedê hesabpersayîş tewrê çalakîyan bibo wayîrê şehîdanê Parisî vejîyo''