Endama Fermandarîya Pêroyîye ya QSDyî Newroze Ehmed bi wesîleya 8ê Adare Roja Cinîyan ê Kedkaran a Dinya ANFyî rê qisey kerd.

Newroze Ehmed îfade kerd ke 2021 seba înan serrêka zaf girîng bîye û YPJyî têkoşînê vera DAÎŞî de erkê serkêşîye ard ca. Newroze Ehmed vat: ''Hêzanê YPJyî Hêzanê Asayîşê Zereyî reyde xeylêk operasyonanê vera DAÎŞî de ca girewt.  Mîyanê serre de zî dewleta tirke û cerganê ci hêrişê hêzanê ma û şarê herême kerd. YPJ seba pawitişê şarê ma û herême, seba çinkerdişê nê hêrişan cepheyanê verênan de ca girewt.''

Newroze Ehmed da zanayene ke YPJyî kombîyayîşanê xo de babetê perwerde, rêxistinîye, karê leşkerî û babetê sey nînan ercnayî û goreyê ney sîstemê xo yo newe awan kerd. Newroze Amed vat: ''Netîceya nê amadekarîyan de ma xeylêk hêrişî pûç kerdî. Hêrişê Zîndanê Hesekê ke hêzanê ma yê komando, îstîxbaratî û hêzanê taybetan tewr vernî de ca girewt.

Cinîyê rêxistinbîyayeyî serkêşîya komelî kenê coka tim benê hedefê hêrişan. Coka xopawitişê cinîyan zaf girîng o. Nê esasî ser o ganî bingeyê hêzanê pawitişê meşrûyî tim estbo. Eke cinîyî biresê na hişmendîye hînî her warê cuye de eşkenê hêzê pawitişê meşrûyî awan bikerê û nê esasî ser o her war de xo bipawê.

YPJyî Rojawan û pêro Rojhelatê Mîyanênî de morê xo da binê modelêkê mîsalî. YPJ hînî bîyo hêzêko global û tesîrê pêro cinîyan keno. Mîyanê YPJyî de cinîyê cîya-cîyayî ca gênê. Hêzo winasên zî xora do vurnayîşanê pîlan keno. Hetê bînî ra no çi mesuldarîyêka pîle dano milê ma ser; ma xo cinîyanê pêro dinya ra mesuldar vînenê. Nika wext wextê azadîya cinîyan o. Ma dejanê xo, destkewteyanê xo hempar bikerê û têkoşîn bikerê. Bi nê hawayî ma eşkenê hişmendîya ke cinîyan qir kena, çin bikerê. Ma ney rê amade yê. YPJ hêzê pawitişî yê pêro cinîyan o. Qet yew cinîye wa xo têna nêvîna, ma hetê înan de yê.''